តាមទិន្នន័យពី FlightRadar24 គិតត្រឹមម៉ោង ៩ ព្រឹកថ្ងៃទី ២១ ខែមីនា ឆ្នាំ ២០២៥ (ពេលវេលាក្នុងតំបន់) យន្តហោះចំនួន ១២០ គ្រឿងត្រូវបង្ខំហោះវិលវល់ពេញអាកាសស្វែងរកកន្លែងចុះចត ក្រោយព្រលានយន្តហោះ Heathrow ដែលជាព្រលានយន្តហោះធំជាងគេបំផុតនៅទីក្រុងឡុងដុង ប្រទេសអង់គ្លេស ត្រូវបានបិទដោយសារមានអគ្គិភ័យមួយបានឆាបឆេះនៅស្ថានីយអគ្គិសនីដែលមានចម្ងាយមិនដល់ ២ ម៉ៃពីព្រលាន បណ្ដាលឱ្យមានការដាច់ភ្លើងពាសពេញព្រលាន។
ការប្រកាសបិទព្រលាននេះដែរបានធ្វើឱ្យប៉ះពាល់ដល់ជើងហោះហើរជាង ១៣៥០ ដោយក្នុងនោះរួមមាន ៦៧៩ ជើងគ្រោងនឹងហោះមកដល់ និង ៦៧៨ ជើងទៀតគ្រោងនឹងហោះចេញពី Heathrow ទៅ។ ជាក់ស្ដែង យន្តហោះ ១៣៥៧ ជើងត្រូវបានលុបចោល បកក្បាលត្រឡប់ក្រោយ ឬពន្យារពេលនៅថ្ងៃទី ២១ ខែមីនា ដោយក្នុងនោះយន្តហោះខ្លះដែលគោលដៅត្រូវចុះនៅឡុងដុង ត្រូវបង្ខំបកទៅចុះចតនៅព្រលានយន្តហោះក្បែរៗនោះជំនួសវិញ។ មួយក្នុងចំណោមនោះគឺព្រលានយន្តហោះ Gatwick តែយ៉ាងណាមិញ ព្រលានមួយនេះគឺមានយន្តហោះចុះចតច្រើនខ្លាំងពេក និង លែងអាចទទួលការចុះចតបន្ថែមទៀតបានឡើយ។
គួររំឭកថា កាលពីថ្មីៗកន្លងទៅ ខាងអ្នកនាំពាក្យឱ្យព្រលានយន្តហោះ Heathrow បានប្រកាសថា៖ «ព្រលានយន្តហោះ Heathrow បានជួបបញ្ហាដាច់ភ្លើងពាសពេញទាំងព្រលានដោយសារតែមានអគ្គិភ័យដ៏ខ្លាំងក្លាមួយបានឆាបឆេះនៅស្ថានីយផ្គត់ផ្គង់អគ្គិសនីនៅក្បែរនោះ។ ខណៈខាងក្រុមពន្លត់អគ្គិភ័យកំពុងតែប្រតិបត្តិការណ៍ពន្លត់ភ្លើង ពួកយើងនៅមិនទាន់ច្បាស់ឡើយថាពេលណាភ្លើងអាចដំណើរការបានឡើងវិញនោះ។
ដើម្បីជាការធានាដល់សុវត្ថិភាពអ្នកដំណើរ រួមទាំងក្រុមការងាររបស់ពួកយើង យើងគឺមិនមានជម្រើសនោះឡើយដោយត្រូវបង្ខំចិត្តបិទព្រលានចោលសិនរហូតដល់ម៉ោង ២៣ និង ៥៩ នាទីថ្ងៃទី ២១ ខែមីនា ឆ្នាំ ២០២៥ (ពេលវេលាក្នុងតំបន់)។ យើងរំពឹងថានឹងមានបញ្ហារអាក់រអួលខ្លាំងក្នុងប៉ុន្មានថ្ងៃខាងមុខនេះ ហើយអ្នកដំណើរទាំងអស់ទោះស្ថិតក្រោមស្ថានភាពណាក៏ដោយមិនគួរធ្វើដំណើរមកព្រលានឡើយរហូតទាល់តែព្រលានបើកដំណើរការឡើងវិញ។
ពួកយើងនឹងផ្ដល់ការ update បន្ថែម នៅពេលដែលដំណឹងពាក់ព័ន្ធនឹងការបើកដំណើរការឡើងវិញច្បាស់ការ។ ពួកយើងដឹងថាបញ្ហានេះធ្វើឱ្យអ្នកដំណើរមានការខកចិត្ត ហើយពួកយើងចង់ធានាថាពួកយើងនឹងប្រឹងប្រែងឱ្យអស់ពីសមត្ថភាពដើម្បីដោះស្រាយនៅស្ថានការណ៍នេះ»៕
