កាលពីសប្ដាហ៍មុន យន្តហោះមួយគ្រឿងរបស់ក្រុមហ៊ុន Ryanair ដែលគ្រោងនឹងហោះចេញពីទីក្រុង Rome ប្រទេសអ៊ីតាលី ឆ្ពោះទៅប្រទេសអាល្លឺម៉ង់ បានជួបប្រទះនឹងហេតុការណ៍ដ៏កម្រមួយរហូតត្រូវផ្អាកការហោះចេញភ្លាមៗ។ តាមព័ត៌មានបានឱ្យដឹងថា មុនពេលអ្នកដំណើរឡើងលើយន្តហោះ Boeing 737 មួយគ្រឿងនោះ បុគ្គលិកលើយន្តហោះស្រាប់តែឮសំឡេងសត្វឆ្មាស្រែកម៉េវៗ ហើយក្រោយត្រួតពិនិត្យមើលទៅ ខាងក្រុមបច្ចេកទេសបានរកឃើញសត្វឆ្មាមួយក្បាលសម្បុរខ្មៅសលាក់ខ្លួនពួននៅក្នុងម៉ាស៊ីនយន្តហោះ។
វត្តមានរបស់សត្វឆ្មាមួយក្បាលនេះដែរ បានបង្ខំឱ្យជើងហោះហើរមួយនេះត្រូវលុបចោលភ្លាមៗដើម្បីខាងក្រុមបច្ចេកទេសអាចផ្ដោតអារម្មណ៍ស្វែងរកវិធីយកឆ្មានោះចេញមកក្រៅ។ ដំណើរការចាប់ឆ្មាចេញពីម៉ាស៊ីនយន្តហោះនេះដែរគឺមិនងាយស្រួលសម្រាប់ក្រុមការងារនោះឡើយ ព្រោះថាឆ្មាវាមិននៅស្ងៀមផ្លាស់ទីទៅនេះទៅនោះធ្វើឱ្យពួកគេពិបាកក្នុងការចាប់ចេញមែនទែន។
ប្រតិបត្តិការតាមប្រមាញ់សត្វឆ្មាកំហូចចេញពីម៉ាស៊ីនយន្តហោះត្រូវបានបរាជ័យ តែយ៉ាងណាមិញក្រោយភាពវឹកវរអស់ ២ ថ្ងៃ សត្វឆ្មាកំហូចក៏បានដើរចេញពីក្នុងយន្តហោះចុះតាមជណ្ដើរដើរចុះយ៉ាងរំភើយ ហើយយន្តហោះក៏អាចដំណើរការបានវិញ និង ធ្វើការហោះចេញទៅប្រទេសអាល្លឺម៉ង់នៅថ្ងៃទី ១០ ខែកុម្ភៈ ឆ្នាំ ២០២៥ កន្លងទៅ។
ទោះជាយ៉ាងណាក៏ដោយ ខាងជើងហោះហើរក៏បានបញ្ជាក់ដែរថា ការដែលរកឃើញថាមានសត្វឆ្មាក្នុងម៉ាស៊ីនមុនការហោះហើរគឺចាត់ទុកជារឿងល្អផងដែរ ព្រោះវាជួយបញ្ចៀសនូវគ្រោះថ្នាក់ដែលអាចកើតមានឡើងជាយថាហេតុ៕
