កាលពីថ្ងៃទី ២៤ ខែឧសភា ឆ្នាំ ២០២៥ កន្លងទៅ មានករណីដ៏ហួសចិត្តមួយដោយយន្តហោះ Delta Airlines លេខហោះហើរ 2348 ដែលគ្រោងហោះចេញពីក្រុង Minneapolis ទៅ Madison, Wisconsin ត្រូវពន្យារជើងហោះហើររហូតដល់ទៅ ២ ដង ដោយសារតែការអុកឡុកពីសត្វព្រាបចំនួន ២ ក្បាល។
ក្រោយអ្នកដំណើរឡើងយន្តហោះអស់ និង យន្តហោះរៀបនឹងរត់លើផ្លូវ ក៏ស្រាប់តែពីឡុតបានអាយកូមប្រកាសថា មានសត្វព្រាបចូលក្នុងយន្តហោះ ហើយលោកគ្មានបទពិសោធចាប់ព្រាប និង គ្រប់គ្រងស្ថានការណ៍នេះទេ។
ក្រោយទទួលដំណឹង ខាងបុគ្គលិកនៅខាងក្រោមក៏បានឡើងលើយន្តហោះ ហើយក៏ចាប់ព្រាបចេញបានដោយជោគជ័យ។ យ៉ាងណាមិញ ខណៈយន្តហោះកំពុងតែរត់លើផ្លូវត្រៀមនឹងហោះចេញទៅនោះ អ្នកដំណើរក៏ប្រទះឃើញមានសត្វព្រាបមួយក្បាលទៀត។ អ្នកដំណើរម្នាក់ទាញអាវក្រៅយកមកគ្របឃាំងកុំឱ្យព្រាបហោះទៅខាងក្រោយយន្តហោះធ្វើឱ្យព្រាបធ្លាក់ចុះមកក្រោម។ ក្រោយមក ខាងបុគ្គលិកព្រលានក៏បានយកព្រាបទី ២ ចេញពីយន្តហោះដោយសុវត្ថិភាព។
ក្រុមហ៊ុន Delta បានធ្វើការសុំទោសចំពោះអ្នកដំណើរទាំងអស់ចំពោះរឿងហេតុដែលបានកើតឡើងធ្វើឱ្យការធ្វើដំណើរត្រូវពន្យារពេលដល់ជិត ១ ម៉ោង ហើយក៏បង្ហាញការស្ញប់ស្ញែងចំពោះបុគ្គលិកព្រលាន ក៏ដូចជាអ្នកដំណើរផ្ទាល់ក្នុងការគ្រប់គ្រងស្ថានការណ៍ជួយចាប់ព្រាបចេញបានដោយសុវត្ថិភាព៕
