ស្ត្រីចំណាស់អាយុ ៦៦ ឆ្នាំម្នាក់នៅក្រុងសៀងហៃ ប្រទេសចិន ត្រូវបានឱ្យដឹងថា បានចំណាយប្រាក់ជិត ២ លានយ័ន (២៧៨ ៦០០ ដុល្លារ) លើការទិញទំនិញតាមអនឡាញរយៈពេល ១ ឆ្នាំ។ អីវ៉ាន់ដែលទិញមកទាំងប៉ុន្មាន រូបគាត់គឺមិនបានបើកប្រើនោះឡើយចេះតែបោះទុកគរលើគ្នាពាសពេញតែក្នុងផ្ទះរហូតដល់ថ្នាក់ចង់ចូលដេក គឺត្រូវវាររកប្រឡង់ដើម្បីដេកបាន។
បើតាមការចេញផ្សាយរបស់ Qilu Evening News ស្ត្រីចំណាស់ខាងលើមានឈ្មោះ Wang រស់នៅក្នុងសង្កាត់ Jiading ក្រុងសៀងហៃ ប្រទេសចិន។ ក្នុងរយៈពេលប៉ុន្មានឆ្នាំថ្មីៗនេះ រូបគាត់គឺញៀននឹងការទិញអីវ៉ាន់អនឡាញខ្លាំងរហូតអីវ៉ាន់គរពេញផ្ទះ។ ចាប់តាំងពីខែឧសភា ឆ្នាំ ២០២៤ កន្លងទៅ អ្នកជិតខាងជាច្រើនបានរអ៊ូពីក្លិនស្អុយ និង ការកើតមានសត្វល្អិត សត្វកន្លាត ចេញពីផ្ទះរបស់លោកស្រី Wang ធ្វើឱ្យពួកគេបារម្ភពីអនាម័យកន្លែងរស់នៅជាខ្លាំង។ ជាក់ស្ដែង តាមសម្ដីអ្នកជិតខាងម្នាក់ត្រកូល Lu បាននិយាយរៀបរាប់ថា៖ «រាល់ព្រឹក ពេលដែលខ្ញុំបើកទ្វារ គឺដឹងតែមានក្លិនស្អុយខ្លាំងភាយមកតែម្ដង»។
តាមការស្រាវជ្រាវបានបង្ហាញថា ការចូលចិត្តប្រមូលអីវ៉ាន់ទុកគរខុសប្រក្រតីបែបនេះគឺភាគច្រើនតែងតែឃើញកើតមានលើមនុស្សវ័យចំណាស់ ដែលវាអាចពាក់ព័ន្ធនឹងជំងឺផ្លូវចិត្តមួយចំនួនរួមមានជំងឺវង្វេងវង្វាន់ និង ជំងឺបាក់ទឹកចិត្តជាដើម។ យ៉ាងណាមិញ ចំពោះករណីលោកស្រី Wang បើតាមការរៀបរាប់របស់គាត់ប្រាប់អ្នកកាសែតបានឱ្យដឹងថា គាត់ចូលចិត្តទិញអីវ៉ាន់ព្រោះវាធ្វើឱ្យគាត់សប្បាយចិត្ត ហើយហេតុផលមួយទៀតនោះគឺគាត់ចំណាយលុយច្រើនអស់ៗក៏ព្រោះតែគាត់ខ្លាចមានអ្នកមកសុំខ្ចីលុយ។ លោកស្រី Wang បាននិយាយថា៖ «ក្រោយលក់ផ្ទះនៅកណ្ដាលក្រុង ហើយផ្លាស់មកនៅទីនេះ ខ្ញុំគឺតែងតែខ្លាចថាមានអ្នកដឹងថាខ្ញុំមានលុយ ហើយមកសុំខ្ចីលុយខ្ញុំ។ អ៊ីចឹងហើយខ្ញុំគិតថាវាល្អជាងក្នុងការចាយលុយទាំងអស់ជាជាងឱ្យអ្នកផ្សេងឃើញចង់ខ្ចីហើយពិបាកទារវិញ»។
តាមរបាយការណ៍ព័ត៌មានបានបញ្ជាក់ដែរថា កូនស្រីរបស់លោកស្រី Wang គឺរស់នៅក្រៅប្រទេសហើយកម្រទាក់ទងមកគ្រួសារណាស់។ ខាងរដ្ឋាភិបាលក្នុងតំបន់បានព្យាយាមទាក់ទងទៅជាច្រើនលើកដោយសង្ឃឹមថាអាចរកដំណោះស្រាយលើបញ្ហានេះបាន ប៉ុន្តែមិនទទួលបានការឆ្លើយតបអ្វីឡើយ។ យ៉ាងណាមិញ ចុងក្រោយដោយទទួលបានការយល់ព្រមពីលោកស្រី Wang ខាងអាជ្ញាធរក៏បានដឹកនាំសមាជិកខ្លួនទៅជួយសម្អាតគំនរអីវ៉ាន់ រៀបចំកន្លែងស្នាក់នៅឱ្យល្អជួយសម្រួលដល់ការរស់នៅរបស់គាត់ឱ្យមានផាសុខភាពឡើងវិញ៕
