កាលពីថ្ងៃទី ១៩ ខែមីនា ឆ្នាំ ២០២៥ កន្លងទៅ រដ្ឋមន្ត្រីក្រសួងដឹកជញ្ជូនប្រចាំប្រទេសម៉ាឡេស៊ីលោក Anthony Loke បានប្រកាសថា ប្រទេសម៉ាឡេស៊ីបានយល់ព្រមចុះកុងត្រាជាមួយក្រុមហ៊ុន Ocean Infinity ហើយ ដោយអនុញ្ញាតឱ្យក្រុមហ៊ុននេះចាប់ផ្ដើមបើកការរុករកនៅបាតសមុទ្រក្នុងតំបន់រុករកថ្មីទំហំ ១៥ ០០០ គីឡូម៉ែត្រការ៉េនៅភាគខាងត្បូងមហាសមុទ្រឥណ្ឌា។
តាមកុងត្រាបានបញ្ជាក់ថា ប្រសិនបើយន្តហោះត្រូវបានរកឃើញ នោះក្រុមហ៊ុន Ocean Infinity នឹងទទួលបានប្រាក់ចំនួន ៧០ លានដុល្លារ ដោយឡែកប្រសិនបើបេសកកម្មមួយនេះទទួលបរាជ័យ ខាងរដ្ឋាភិបាលម៉ាឡេស៊ីនឹងនៅរក្សាគោលការណ៍ «រកមិនឃើញ មិនទទួលបានលុយ» ដោយស្រដៀងគ្នាទៅនឹងដំណើររុករកបរាជ័យដែល Ocean Infinity ធ្វើឡើងកាលពីឆ្នាំ ២០១៨ កន្លងទៅដែរ។
លោករដ្ឋមន្ត្រី Loke បាននិយាយថា ការចុះកិច្ចព្រមព្រៀងគ្នានេះនឹងកំណត់សម្រាប់រយៈពេល ១៨ ខែ ប៉ុន្តែការរុករកត្រូវចំណាយពេលយូរប៉ុណ្ណាគឺនៅមិនទាន់ដឹងច្បាស់នៅឡើយទេ។ រដ្ឋាភិបាលម៉ាឡេស៊ី ក៏បានសន្យាដែរថានឹងផ្ដល់ព័ត៌មានប្រកបដោយតម្លាភាពជូនដល់ក្រុមគ្រួសារជនរងគ្រោះលើយន្តហោះ MH370 នោះ។
គួររំឭកថា យន្តហោះ Boeing 777 ជើងហោះហើរលេខ MH370 ដឹកមនុស្សសរុប ២៣៩ នាក់ បានបាត់ខ្លួនពីកញ្ចក់រ៉ាដាកាលពីថ្ងៃទី ០៨ ខែមីនា ឆ្នាំ ២០១៤ កន្លងទៅ ខណៈគោលដៅហោះចេញពីទីក្រុងកូឡាឡាំពួរ ប្រទេសម៉ាឡេស៊ី ឆ្ពោះទៅកាន់ទីក្រុងប៉េកាំង ប្រទេសចិន។ ក្នុងរយៈពេល ១១ ឆ្នាំមកនេះ បេសកកម្មរុករកជាច្រើនត្រូវបានធ្វើឡើងប៉ុន្តែនៅតែមិនទទួលបានលទ្ធផលច្បាស់លាស់អ្វីនោះឡើយ៕
ប្រភព៖ Kenh14
