កាលពីថ្ងៃទី ១០ ខែមីនា ឆ្នាំ ២០២៥ កន្លងទៅ កូរ៉េខាងត្បូងបានបាត់បង់បុគ្គលមានសមត្ថភាពមួយរូបទៀតហើយដោយតារាចម្រៀងប្រុស Wheesung ត្រូវបានប្រទះឃើញស្លាប់ក្នុងផ្ទះក្នុងវ័យ ៤៣ ឆ្នាំ។
បើតាមប៉ូលិស និង នាយកដ្ឋានពន្លត់អគ្គិភ័យបានឱ្យដឹងថា តារាចម្រៀង Wheesung ត្រូវបានប្រទះឃើញដួលសន្លប់បាត់ស្មារតីនៅក្នុងអាផាតមិននាសង្កាត់ Gwangjin ក្រុងសេអ៊ូល នៅវេលាម៉ោងប្រមាណ ៦ និង ២៩ នាទីយប់ (ពេលវេលាក្នុងតំបន់)។ ក្រុមគ្រួសាររបស់លោកបានរាយការណ៍ពីករណីនេះ ដែលនាំឱ្យខាងក្រុមសង្គ្រោះបន្ទាន់ត្រូវបញ្ជូនទៅកាន់ទីតាំងភ្លាមៗ។
ចំពោះមូលហេតុនៃការស្លាប់ ខាងអាជ្ញាធរកំពុងធ្វើការស៊ើបអង្កេត តែយ៉ាងណាប៉ូលិសសន្និដ្ឋានដំបូងថា Wheesung អាចនឹងស្លាប់ដោយការលេបថ្នាំលើសកំណត់ ឬធ្វើអត្តឃាតខ្លួនឯង។ ប៉ូលិសបញ្ជាក់បន្ថែមដែរថា មិនមានរកឃើញសកម្មភាពអ្វីពាក់ព័ន្ធនឹងបទឧក្រិដ្ឋនោះឡើយ តែពួកគេនៅបន្តស៊ើបទៀតរកមើលក្រែងជនរងគ្រោះមានបន្សល់ទុកសំបុត្របណ្ដាំណាមួយ។
ដំណឹងមរណភាពភ្លាមៗនៃតារាចម្រៀងប្រុសរូបនេះបានធ្វើឱ្យអ្នកគាំទ្រ ក៏ដូចជាមិត្តរួមអាជីពជាមួយគ្នាមានការសោកស្ដាយ និង តក់ស្លុតជាពន់ពេក។ Wheesung បានចាប់អាជីពជាតារាចម្រៀងដំបូងក្នុងឆ្នាំ ២០០២ ដោយអាល់ប៊ុមដំបូងរបស់លោក «Like a Movie» បានផ្ទុះប្រជាប្រិយភាពខ្លាំងជាមួយនឹងបទចម្រៀង «Can’t I?»។ ក្រោយមក លោកបានបន្តសាងប្រជាប្រិយភាពជាមួយនឹងបទចម្រៀងល្បីៗផ្សេងទៀតដូចជាបទ «With Me», «The Day We Met Again», «Incurable Disease» និង បទ «One Year»៕
ប្រភព៖ AllKpop
