ក្មេងប្រុសអាយុ ១៥ ឆ្នាំម្នាក់នៅប្រទេសចិន មានឈ្មោះថា Xiaoyu មានទម្លាប់ចូលចិត្តលេងហ្គេមដាច់យប់រយៈពេល ៣ ឆ្នាំ ដោយមិនមានការតាមដានដិតដល់ពីឪពុកម្ដាយ រហូតបណ្ដាលឱ្យរូបគេឈប់លូតលាស់ឆ្អឹងមុនអាយុ អស់កម្ពស់ត្រឹម ១.៣៨ ម៉ែត្រ។
រឿងរ៉ាវរបស់ក្មេងប្រុសខាងលើនេះ ត្រូវបានចេញផ្សាយដោយកាសែតចិន Sinchew កាលពីថ្ងៃទី ០១ ខែធ្នូ ឆ្នាំ ២០២៥ កន្លងទៅ ដោយក្មេងប្រុសខាងលើជាអ្នកក្រុង Zhengzhou ខេត្ត Henan ប្រទេសចិន។ មានពេលមួយរូបគេបានសួរទៅម្ដាយខ្លួនថា៖ «មិត្តខ្ញុំគ្រប់គ្នាសុទ្ធតែកម្ពស់ជិត ១.៧ ម៉ែត្រ ម៉េចក៏ខ្ញុំនៅតែមានកម្ពស់ត្រឹម ១.៣៨ ម៉ែត្រ?»។ ដោយក្ដីបារម្ភចំពោះសុខភាពកូន ព្រោះកម្ពស់លូតលាស់ខុសពីក្មេងប្រុសដទៃពេក ក្រុមគ្រួសាររបស់ Xiaoyu ក៏បាននាំគេទៅកាន់មន្ទីរពេទ្យដើម្បីពិនិត្យមើល។
តាមលទ្ធផលតេស្ត X-raus បានបង្ហាញឱ្យឃើញថា ឆ្អឹងខ្ចី (epiphyseal cartilage) របស់ Xiaoyu គឺបានឡើងរឹងទៅជាឆ្អឹងចាស់បាត់ទៅហើយ ពោលមានន័យថា ទោះបីជាគេអាយុត្រឹម ១៥ ឆ្នាំក៏ពិតមែន ប៉ុន្តែអាយុកាលឆ្អឹងរបស់គេគឺស្មើនឹងឆ្អឹងក្មេងជំទង់អាយុ ១៨ ឆ្នាំ។ លោកវេជ្ជបណ្ឌិត Huo Yufeng ដែលជាអ្នកពិនិត្យ Xiaoyu ដោយផ្ទាល់ បានបញ្ជាក់ថា ឱកាសនៃការលូតកម្ពស់របស់ Xiaoyu គឺសឹងតែស្មើសូន្យ ព្រោះតែឆ្អឹងរបស់គេលែងលូតលាស់ទៅហើយ។
ចំពោះមូលហេតុបណ្ដាលឱ្យបែបនេះ គឺមកពីទម្លាប់មិនល្អយូរឆ្នាំរបស់គេ ដោយសារតែឪពុកម្ដាយរវល់ជាមួយការរកស៊ី គ្មានពេលតាមដានមើលគេដិតដល់ Xiaoyu គឺបានក្លាយជាក្មេងញៀនលេងហ្គេមតាំងពីនៅអាយុ ១២ ឆ្នាំ។ ដំបូងឡើយ រូបគេលេងហ្គេមដល់ត្រឹមម៉ោង ១១ យប់ ប៉ុន្តែក្រោយមកក៏ជក់ខ្លាំងទៅៗ រហូតឃ្លុំភួយពួនលេងរហូតដល់ម៉ោង ២ ទៅ ៣ ភ្លឺ។
លោកគ្រូពេទ្យ Huo បានពន្យល់ថា វ័យ ១៥ ឆ្នាំ គឺពេលវេលាមាសសម្រាប់មនុស្សប្រុសក្នុងការលូតលាស់កម្ពស់ ហើយការគេងគឺជាកត្តាសំខាន់បំផុតក្នុងការជំរុញការលូតលាស់មួយនេះ។ អរម៉ូនលូតលាស់របស់មនុស្សគឺបញ្ចេញខ្លាំងបំផុតក្នុងពេលវេលាចំនួន ២ ដោយមួយចាប់ពីម៉ោង ១០ យប់ទៅដល់ម៉ោង ១ ភ្លឺនៅថ្ងៃបន្ទាប់ និង មួយទៀតនៅម៉ោង ៥ ព្រឹកដល់ ៦ ព្រឹក។ ចំនួនអរម៉ូនក្នុងចន្លោះពេលនោះគឺ ២-៤ ដងខ្ពស់ជាងពេលថ្ងៃ។ ការដែលមិនសម្រាកនៅយប់ជ្រៅពេក ឬដាច់យប់ញឹកញយ អាចបណ្ដាលឱ្យរាងកាយមិនទទួលបានអរម៉ូនគ្រប់គ្រាន់សម្រាប់លូតលាស់ឆ្អឹង។ បន្ថែមពីនេះ ពន្លឺពណ៌ខៀវ (blue light) ចេញពីអេក្រង់ទូរស័ព្ទ ក៏បានរារាំងដល់ការបញ្ចេញអរម៉ូនម៉េឡាតូនីន (melatonin) ដែលជាអរម៉ូនជំនួយដល់ការគេង ក៏ជាផលប៉ះពាល់ប្រយោលដល់ការលូតលាស់ឆ្អឹងដូចគ្នា។
ជុំវិញករណីនេះដែរ ខាងអ្នកជំនាញបានព្រមានដល់ឪពុកម្ដាយគ្រប់រូបឱ្យយកចិត្តទុកដាក់រឹតបន្ដឹងលើពេលវេលារស់នៅរបស់កូនៗបន្តិច ដោយក្មេងៗត្រូវតែចូលគេងមុនម៉ោង ១០ យប់ និង ត្រូវគេងក្នុងបរិយាកាសងងឹតស្លុបតែម្ដង៕
