អាពាហ៍ពិពាហ៍គឺជាពិធីមង្គលមួយដែលមនុស្សពីរនាក់ស្រឡាញ់គ្នាបានសម្រេចចាប់ដៃគ្នាក្លាយជាប្ដីប្រពន្ធស្របច្បាប់រួមរស់ជាមួយគ្នាអស់មួយជីវិត។ ទោះជាយ៉ាងណា ពិធីសប្បាយរីករាយមួយនេះអាចប្រែទៅជាពិធីក្រឡាប់ចាក់ប្រសិនបើមានភ្ញៀវដែលមិនបានអញ្ជើញបង្ហាញខ្លួនឡើង។ ជាក់ស្ដែង រឿងរ៉ាវមួយនៅប្រទេសចិនដែលអតីតមិត្តស្រីបានស្លៀកពាក់ក្នុងឈុតរ៉ូបកូនក្រមុំបានសម្រុកចូលក្នុងពិធីមង្គលការរបស់កូនកំលោះហើយធ្វើការលុតជង្គង់សុំអង្វរឱ្យខាងប្រុសត្រឡប់មកត្រូវរ៉ូវគ្នាវិញ ដោយហេតុការណ៍នេះបានធ្វើឱ្យកូនក្រមុំរួមទាំងភ្ញៀវដែលចូលរួមនាំគ្នាស្រឡាំងកាំងភ្ញាក់ផ្អើលជាខ្លាំង។
ការពិតទៅ រឿងមួយនេះដែរបានកើតឡើងតាំងពីឆ្នាំ ២០១៩ មកម្ល៉េះ ប៉ុន្តែវាទើបតែផ្ទុះផ្អើលថ្មីៗនេះម្ដងទៀតក្រោយមានការបង្ហោះឡើងវិញ។ តាមរយៈវីដេអូដែលបង្ហោះបានបង្ហាញឱ្យឃើញអំឡុងពេលកូនក្រមុំ និង កូនកំលោះកំពុងតែអបអរថ្ងៃមង្គលរបស់ពួកគេ ភ្លាមៗក៏ស្រាប់តែមានស្ត្រីម្នាក់បង្ហាញខ្លួនឡើង។ អ្វីដែលធ្វើឱ្យគ្រប់គ្នាភ្ញាក់ផ្អើលខ្លាំងបំផុតនោះគឺស្ត្រីរូបនោះមកស្លៀកពាក់ក្នុងឈុតរ៉ូបសដូចទៅកូនក្រមុំថែមទៀត ដោយដើរឆ្ពោះសំដៅទៅរកកូនកំលោះតែម្ដង។
ក្រោយជួបកូនកំលោះហើយ ស្រាប់តែនារីរូបនោះលុតជង្គង់ចុះស្រែកយំ និង សុំអង្វរកូនកំលោះកុំឱ្យលោករៀបការអីព្រោះតែនាងនៅស្រឡាញ់លោកខ្លាំងណាស់។ ងាកទៅកូនក្រមុំដែលឈរក្បែរកូនកំលោះវិញ ស្ថិតក្នុងស្ថានភាពបែបនេះរូបនាងមិនដឹងថាត្រូវប្រតិកម្មយ៉ាងម៉េចនោះឡើយ។ ខាងកូនកំលោះព្យាយាមគ្រលៀសដៃចេញពីនារីជាសង្សារចាស់ និង ព្យាយាមទៅនិយាយបកស្រាយដាក់អនាគតប្រពន្ធរបស់ខ្លួន ដោយចុងក្រោយនារីជាសង្សារចាស់ក៏បានចុះពីលើឆាកទៅវិញ។
យ៉ាងណាមិញ ក្រោយវីដេអូនេះត្រូវបានបង្ហោះចែកចាយ មហាជនជាច្រើនបាននាំគ្នាបញ្ចេញមតិវែកញែករៀងៗខ្លួន ដោយខ្លះបង្ហាញក្ដីអាណិតចំពោះនារីជាសង្សារចាស់ ខណៈមួយចំនួនទៀតបង្ហាញការរិះគន់នាងចំពោះទង្វើមិនសមគួរបំផ្លាញថ្ងៃពិសេសរបស់អ្នកដទៃបែបនេះ៕
