មហាជនស្លុ./តចិត្តជាថ្មី ក្រោយធ្លាយដំណឹងតារាប្រុសចិនម្នាក់ទៀត ទទួលមរណភាពភ្លាមៗត្រឹមវ័យ ២៧ ឆ្នាំ

នៅដើមឆ្នាំម្សាញ់ ឆ្នាំ ២០២៥ នេះ វិស័យសិល្បៈប្រចាំប្រទេសចិនកំពុងជួបទុក្ខធំ ដោយការបាត់បង់សិល្បករដ៏ល្បីមួយរូបរបស់ខ្លួនគឺតារាសម្ដែងស្រី Barbie Hsu។ យ៉ាងណាមិញ ឥលូវនេះក៏ទើបតែធ្លាយព័ត៌មានមួយទៀតថា តារាសម្ដែងចិនមួយរូបទៀតហើយគឺលោក Liang Youcheng បានទទួលមរណភាពភ្លាមៗដូចគ្នា ដែលធ្វើឱ្យមហាជនក្នុងប្រទេសចិនមានការសោកស្ដាយ និង តក់ស្លុតជាខ្លាំង។

តាមសារព័ត៌មាន Sohu បានឱ្យដឹងថា តារាសម្ដែងប្រុស Liang Youcheng បានទទួលមរណភាពកាលពីថ្ងៃទី ៣០ ខែមករា ឆ្នាំ ២០២៥ កន្លងទៅ (ចំថ្ងៃទី ២ នៃពិធីបុណ្យចូលឆ្នាំចិន) ក្នុងវ័យ ២៧ ឆ្នាំ ដោយសារតែការឆ្លងមេរោគនៅប្រព័ន្ធសរសៃប្រសាទកណ្ដាល។ អ្វីដែលធ្វើឱ្យមហាជនកាន់តែក្ដុកក្ដួលចិត្តខ្លាំងជាងនេះទៅទៀតនោះ គឺនៅពេលព័ត៌មានទម្លាយថាតារាប្រុស Liang Youcheng ក្នុងឆ្នាំនេះមិនបានត្រឡប់ទៅផ្ទះចាយពេលវេលាជាមួយក្រុមគ្រួសារក្នុងថ្ងៃបុណ្យចូលឆ្នាំថ្មីនោះឡើយ ដោយសារតែរូបលោកមានបញ្ហាសុខភាពទៅពេទ្យធ្វើការពិនិត្យតែម្នាក់ឯង និង ចុងក្រោយក៏ត្រូវចាយពេលវេលាចុងក្រោយនៃជីវិតតែម្នាក់ឯងក្នុងមន្ទីរពេទ្យដោយគ្មានវត្តមានសាច់ញាតិ ក្រុមគ្រួសារ ឬមិត្តភក្តិនៅក្បែរខ្លួននោះឡើយ។

ដោយសារតែតារាប្រុស Liang Youcheng លាចាកលោកទៅដោយស្ងាត់ៗអំឡុងពេលបុណ្យចូលឆ្នាំចិននេះហើយ ទើបព័ត៌មានទើបតែផ្ទុះផ្អើលដំណឹងមរណភាពរបស់លោកនាពេលថ្មីៗនេះប៉ុណ្ណោះ។ គួរបញ្ជាក់ថា តារាសម្ដែងប្រុស Liang Youcheng បានឈានជើងចូលវិស័យសិល្បៈក្នុងឆ្នាំ ២០២០ ដោយបានដើរតួសម្ដែងជាតួអង្គរាយរងក្នុងរឿងភាគទូរទស្សន៍ជាច្រើន ហើយរូបលោកក៏ទទួលបានការចាប់អារម្មណ៍ជាខ្លាំងពីមហាជនក្នុងប្រទេសចិនផងដែរ ក៏ព្រោះតែរូបរាង និង មុខមាត់របស់លោកស្រដៀងគ្នាខ្លាំងទៅនឹងតារាប្រុស Huang Xiaoming កាលពីក្មេង៕

ប្រភព៖ Kenh14, dimsumdaily