អ្នកជំនួញ Wang Xiaofei (អតីតប្ដីរបស់តារាសម្ដែងស្រី Barbie Hsu) នឹងរៀបចំពិធីមង្គលការជាមួយគូស្នេហ៍ជាស្រីស្អាតឈ្មោះ Mandy នៅក្រុងប៉េកាំង ប្រទេសចិន នៅថ្ងៃទី ១៧ ខែឧសភា ឆ្នាំ ២០២៥ ខាងមុខនេះ នេះបើតាមការចេញផ្សាយពីសារព័ត៌មានចិន Sohu។ ពិធីមង្គលការរបស់គូស្នេហ៍ដ៏ល្បីមួយគូនេះ នឹងរៀបចំធ្វើឡើងជាលក្ខណៈឯកជនក្នុងសណ្ឋាគារមួយ។
យ៉ាងណាមិញ បើតាមបណ្ដាញសង្គម QQ សិល្បករដែលទទួលបានសំបុត្រអញ្ជើញពី Wang Xiaofei គឺហាក់មិនមានចំណាប់អារម្មណ៍ក្នុងការចូលរួមពិធីមង្គលការរបស់លោកនោះឡើយដោយក្ដីបារម្ភពីប្រតិកម្មរបស់មហាជន។ ជាក់ស្ដែង កាលពីយប់ថ្ងៃទី ០១ ខែឧសភា ឆ្នាំ ២០២៥ កន្លងទៅ អ្នកច្នៃសម្លៀកបំពាក់មង្គលការដ៏ល្បីម្នាក់ក្នុងប្រទេសចិន បានចេញមុខបដិសេធជាសាធារណៈមិនច្នៃឈុតរៀបការឱ្យគូស្នេហ៍ Wang Xiaofei និង Mandy នោះឡើយ។
តាមការរៀបរាប់ពីអ្នកច្នៃម៉ូដខាងលើបានឱ្យដឹងថា នាងទទួលបានការកុម្មង់ច្នៃឈុតរៀបការពីអ្នកជំនួញប្រុសម្នាក់សម្រាប់ថ្ងៃមង្គលរបស់គេនៅពាក់កណ្ដាលខែឧសភានេះ។ បើទោះជាតម្លៃនៃការកុម្មង់ទទួលបានខ្ពស់ខ្លាំងក៏ដោយ តែនាងបែរជាបដិសេធព្រោះមិនចង់ទម្លាក់តម្លៃខ្លួនឯងឱ្យដូចជាអតិថិជនរូបនោះ។ នាងបានរៀបរាប់ថា៖ «មុនក្លាយជាអ្នកច្នៃម៉ូដម្នាក់ ខ្ញុំគឺជាមនុស្សម្នាក់ផងដែរ ខ្ញុំមិនអាចទន់ចិត្តនឹងចរិត និង ទង្វើគ្មានបេះដូងរបស់គេនោះទេ។ ជាពិសេសនោះ ខ្ញុំក៏ស្រឡាញអតីតប្រពន្ធរបស់គេដែលបានលាចាកលោកទៅថ្មីៗនេះ ហើយខ្ញុំពិតជាខឹងមែនទែនជាមួយទង្វើផិតក្បត់របស់គេដែលធ្វើឱ្យអតីតប្រពន្ធឈឺចាប់»។
បើទោះជាអ្នកច្នៃម៉ូដរូបនោះមិនបានបញ្ជាក់ពីអត្តសញ្ញាណរបស់អតិថិជនរបស់នាងច្បាស់ៗក៏ដោយ ប៉ុន្តែបើតាមអ្វីដែលនាងរៀបរាប់នោះ គ្រប់គ្នាគឺដឹងយ៉ាងច្បាស់ថាគូស្នេហ៍ដែលនាងបដិសេធមិនច្នៃឈុតឱ្យនោះគឺជា Wang Xiaofei និង Mandy។ ក្រោយត្រូវគេរិះគន់ចំៗ ខាងភាគី Wang Xiaofei បានចេញមកឆ្លើយតបថា ពួកគេមិនដែលស្គាល់អ្នកច្នៃម៉ូដរូបនោះឡើយ និង ថែមរិះគន់នាងទៀតថាប្រើប្រាស់ឈ្មោះរបស់ពួកគេដើម្បីទាក់ទាញចំណាប់អារម្មណ៍។ យ៉ាងណាមិញ មិនទាន់បានប៉ុន្មានផងការខមមិនឆ្លើយតបរបស់ Wang Xiaofei ពាក់ព័ន្ធនឹងអ្នកច្នៃម៉ូដរូបនោះ ស្រាប់តែបាត់លែងឃើញតទៅទៀតដោយគ្មានមូលហេតុ។
គួរឱ្យដឹងផងដែរថា ថ្មីៗនេះ សាធារណជនជាច្រើនក្នុងប្រទេសចិនបានមានប្រតិកម្មផ្ទុះវែកញែកបែកផ្សែងជុំវិញដំណឹងប្រកាសរៀបការរបស់លោក Wang Xiaofei ក្រោយ Barbie Hsu ដែលជាអតីតប្រពន្ធទទួលមរណភាពបានត្រឹម ៣ ខែ។ មហជនខ្លះបានរិះគន់ថា Wang Xiaofei ជាមនុស្សគ្មានបេះដូង ខណៈមួយចំនួនទៀតក៏បានចេញមុខការពារដោយលើកឡើងថា Wang Xiaofei និង គូស្នេហ៍ថ្មីបានចុះអេតាស៊ីវិល និង រៀបគម្រោងរៀបការតាំងពីមុន Barbie Hsu ទទួលមរណភាពទៅទៀត ដូច្នេះវាគ្មានហេតុផលអ្វីត្រូវប្រតិកម្មមិនពេញចិត្តនោះឡើយ៕
