អ្នកចូលចិត្តឡើងភ្នំ Fuji តាមច្រកផ្លូវទាំង ៤ នឹងត្រូវគិតលុយម្នាក់ ៤ ពាន់យេន (២៧ ដុល្លារ) ចាប់ពីរដូវក្ដៅនេះតទៅ ក្រោយគម្រោងដែលរៀបចំឡើងដោយរដ្ឋាភិបាលខេត្ត Shizuoka ត្រូវបានអនុម័តដោយជំនួបប្រជុំក្នុងតំបន់ក្នុងសប្ដាហ៍នេះ។
ការផ្លាស់ប្ដូររបស់ខេត្ត Shizuoka នេះដែរ បានធ្វើឡើងក្រោយខេត្តក្បែរខាង Yamanashi ដែលគ្រប់គ្រងច្រកផ្លូវដែលប្រើប្រាស់ទូលំទូលាយជាងគេបំផុតនោះបានលើកឡើងថា ពួកគេនឹងធ្វើការតំឡើងថ្លៃទ្វេដងដល់ ៤ ពាន់យេនសម្រាប់អ្នកដែលឡើងភ្នំដល់កម្ពស់ ៣៧៧៦ ម៉ែត្រ ចាប់ពីរដូវក្ដៅនេះតទៅ ព្រោះតែបារម្ភជុំវិញការឡើងភ្នំកកកុញដែលអាចផ្ដល់ផលប៉ះពាល់ដល់បរិស្ថាន។
ជំនួបប្រជុំប្រចាំខេត្ត Shizuoka នោះដែរក៏បានអនុម័តបទបញ្ញត្តិក្នុងការរឹតបន្តឹងលើការឡើងភ្នំតាមច្រកចំនួន ៣ របស់ខ្លួនចាប់ពីម៉ោង ២ រសៀលរហូតដល់ម៉ោង ៣ ភ្លឺ ដើម្បីកាត់បន្ថយការឡើងភ្នំដាច់យប់ដោយគ្មានការឈប់សម្រាក។ បទបញ្ញត្តិនេះគ្រោងនឹងដាក់អនុវត្តចាប់ពីថ្ងៃទី ០៩ ខែឧសភា តទៅ មុនរដូវកាលឡើងភ្នំមកដល់ក្នុងខែកក្កដា។ គួរឱ្យដឹងថា ខេត្ត Shizouka គ្រប់គ្រងលើច្រកផ្លូវ Fujinomiya, Gotemba និង Subashiri ខណៈខេត្ត Yamanashi ជាអ្នកកាន់កាប់ច្រកផ្លូវ Yoshida។
ដោយឡែក ចំពោះអ្នកដែលចង់ឡើងភ្នំនៅក្រោយម៉ោង ២ រសៀល គឺអនុញ្ញាតឱ្យឡើងបានសម្រាប់តែអ្នកដែលបានកក់ការស្នាក់នៅទីតាំងលើភ្នំប៉ុណ្ណោះ។ បុគ្គលិកនឹងប្រចាំនៅស្ថានីយលេខ ៥ នៃច្រកផ្លូវនោះដើម្បី confirm ប្រាក់ដែលត្រូវបង់។ គួរបញ្ជាក់ដែរថា សម្រាប់ចំណូលដែលទទួលបានពីអ្នកឡើងភ្នំនឹងត្រូវប្រើប្រាស់ដើម្បីរ៉ាប់រងថ្លៃបុគ្គលិក និង វិធានការសុវត្ថិភាព ហើយខាងខេត្តក៏នឹងបញ្ឈប់ការសុំប្រាក់បរិច្ចាគចំនួន ១ ពាន់យេនពីអ្នកឡើងភ្នំដែលប្រើប្រាស់សម្រាប់ជួយថែរក្សាភ្នំនេះតទៅទៀតដែរ៕
ប្រភព៖ SCMP
