តារាសម្ដែង និង ជាតារាចម្រៀងចិន Zhang Yiyang បានក្លាយជាតារាចិនដីគោកដំបូងគេបង្អស់ដែលត្រូវកាត់ទោសប្រហារជីវិតជុំវិញករណីឃាតកម្មដ៏សាហាវលើមិត្តស្រីអាយុ ១៦ ឆ្នាំរបស់ខ្លួន។ តារាប្រុសវ័យ ៣៣ ឆ្នាំរូបនេះ ត្រូវបានកាត់ទោសប្រហារជីវិតដោយការបាញ់សម្លាប់កាលពីថ្ងៃទី ១៨ ខែធ្នូ ឆ្នាំ ២០២៤ កន្លងទៅ ប៉ុន្តែព័ត៌មានមួយនេះទើបតែបានប្រកាសជាសាធារណៈក្នុងខែកក្កដា ឆ្នាំ ២០២៥ ប៉ុណ្ណោះ នេះបើតាមការចេញផ្សាយរបស់សារព័ត៌មានក្នុងប្រទេសចិន និង ប្រភពពីខាងតុលាការ។
តាមសាលក្រមផ្លូវការពីខាងតុលាការប្រជាជនក្រុង Xianyang ខេត្ត Shaanxi បានឱ្យដឹងថា ហេតុការណ៍ឃាតកម្មបានកើតឡើងនៅថ្ងៃទី ២៦ ខែកុម្ភៈ ឆ្នាំ ២០២២ នៅពេលនោះ Zhang Yiyang បានល្បួងមិត្តស្រីឱ្យទៅក្នុងព្រៃដាច់ស្រយាលមួយនៅក្រុង Xingping ដោយបញ្ឆោតប្រាប់នាងថាទៅធ្វើពិធីខួបកំណើតខ្លួនឯង។ ពួកគេបានឈ្លោះគ្នាហើយជនរងគ្រោះបាននិយាយថានាងចង់បែកគ្នា Zhang Yiyang ផ្ទុះកំហឹងក៏បានដកកាំបិតបត់យកមកចាក់ត្រង់ករបស់នាងជាច្រើនកាំបិត បណ្ដាលឱ្យជនរងគ្រោះរងរបួសត្រង់សរសៃឈាមធំនៅក និង បំពង់ខ្យល់ធ្ងន់ធ្ងរ រហូតស្លាប់ភ្លាមៗនៅនឹងកន្លែង។ ករណីសម្លាប់មិត្តស្រីពីសំណាក់តារាសម្ដែងប្រុសខាងលើនេះដែរ ត្រូវបានតុលាការចាត់ទុកជាទង្វើចេតនាដ៏ឃោរឃៅ និង គ្រោះថ្នាក់ដល់សង្គម។
ក្រោយមក Zhang Yiyang បានរៀបចំកន្លែងកើតហេតុឱ្យមើលទៅដូចជាករណីធ្វើអត្តឃាតខ្លួនឯង ហើយក៏រត់គេចខ្លួនបាត់ទៅ។ យ៉ាងណាមិញ សំណាញ់ច្បាប់ញឹក លោកក៏ត្រូវអាជ្ញាធរចាប់ខ្លួនបានភ្លាមៗក្រោយព្យាយាមធ្វើអត្តឃាតខ្លួនក្នុងសណ្ឋាគារប៉ុន្តែមិនស្លាប់។
ក្រោយព័ត៌មានកាត់ទោសលើ Zhang Yiyang បានប្រកាសជាសាធារណៈ មហាជនចិនជាច្រើនបានសម្ដែងការខឹងសម្បាជាខ្លាំង ក៏ព្រោះតែការងាររបស់ Zhang Yiyang រួមមានខ្សែភាពយន្តក៏ដូចជាបទចម្រៀងនៅតែចាក់ផ្សាយជាសាធារណៈទាំងដែលតារាប្រុសរូបនេះត្រូវបានកាត់ទោសរួចហើយនោះ។ មនុស្សជាច្រើនស្នើឱ្យរដ្ឋាភិបាលដាក់ឈ្មោះ Zhang Yiyang ចូលក្នុងបញ្ជីខ្មៅ កុំឱ្យស្នាដៃរបស់គេត្រូវបញ្ចេញលើទីសាធារណៈតទៅទៀត៕
ប្រភព៖ The Economic Times
