អតីតប្រធានាធិបតីសហរដ្ឋអាមេរិក លោក Joe Biden បានរកឃើញថាកើតមានជំងឺមហារីកក្រពេញប្រូស្តាតដែលបានរាលដាលទៅដល់ឆ្អឹងរបស់លោក និង កំពុងពិចារណាជម្រើសសម្រាប់ការព្យាបាល។
បើតាមសេចក្ដីប្រកាសពីខាងការិយាល័យអតីតប្រធានាធិបតី Joe Biden កាលពីថ្ងៃទី ១៨ ខែឧសភា ឆ្នាំ ២០២៥ កន្លងទៅបានរៀបរាប់ថា៖ «លោក Joe Biden បានកើតជំងឺមហារីកក្រពេញប្រូស្តាត។ វាជាប្រភេទមហារីកដ៏កាចសាហាវមួយ ប៉ុន្តែមើលទៅវាដូចជាប្រភេទងាយនឹងប្រតិកម្មអ័រម៉ូន (hormone-sensitive) ដូច្នេះវាអាចផ្ដល់ឱកាសក្នុងការគ្រប់គ្រងជំងឺនេះបាន។ លោកប្រធានាធិបតី និង ក្រុមគ្រួសាររបស់លោកកំពុងតែពិនិត្យមើលលើជម្រើសក្នុងការព្យាបាលជាមួយក្រុមគ្រូពេទ្យជំនាញ»។
គួរបញ្ជាក់ថា ក្រុមគ្រូពេទ្យបានរកឃើញដុំសាច់មហារីកក្រពេញប្រូស្តាតខណៈពិនិត្យសុខភាពរបស់លោក Joe Biden កាលពីសប្ដាហ៍មុន ក្រោយអតីតប្រធានាធិបតីវ័យ ៨២ ឆ្នាំរូបនេះមានអាការពាក់ព័ន្ធនឹងតម្រងនោម។ តាមការបញ្ជាក់ពីគ្រូពេទ្យ៖ «នៅថ្ងៃទី ១៦ ខែឧសភា លោក (Joe Biden) បានរកឃើញកើតមានជំងឺមហារីកកម្រិតខ្ពស់ក្នុងលំដាប់ពិន្ទុ Gleason ៩ ដែលវាបានរាលដាលទៅដល់ឆ្អឹងរបស់លោក»។
លំដាប់ពិន្ទុ Gleason គឺជាមាត្រដ្ឋានសម្រាប់វាស់រកកម្រិតនៃជំងឺមហារីកក្រពេញប្រូស្តាត ដោយការគណនាបូកសរុបពិន្ទុនៃប្រភេទកោសលិកាលេចធ្លោជាងគេបំផុតចំនួន ២ លើដុំសាច់មហារីក ដោយកម្រិតមាត្រដ្ឋានមានពី ១ ដល់ ៥។ ពិន្ទុ Gleason ចំនួន ៩ មានន័យថាវាជាដុំសាច់មហារីកកាចខ្លាំងបំផុត។
តាមប្រភពមួយបានចេញមកបញ្ជាក់ថា លោក Joe Biden បានចំណាយពេលចុងសប្ដាហ៍នៅផ្ទះរបស់លោកនៅក្រុង Wilmington រដ្ឋ Delaware សហរដ្ឋអាមេរិក។ មកទល់ពេលនេះ នៅមិនទាន់មានព័ត៌មានច្បាស់ការណាបញ្ជាក់ពីទីតាំងដែលអតីតប្រធានាធិបតីអាមេរិករូបនេះទទួលការព្យាបាលជំងឺមហារីកនៅឡើយនោះទេ៕
ប្រភព៖ VN Express
