មហាជនក៏ដូចជាអ្នកគាំទ្រជាច្រើនផ្ទុះការភ្ញាក់ផ្អើល ក្រោយស្តេចចុងភៅពិភពលោក Gordon Ramsey ចេញមកបង្ហោះទម្លាយលើបណ្ដាញសង្គមផ្ទាល់ខ្លួនរបស់លោកថា លោកបានកើតជំងឺមហារីកស្បែក និង តម្រូវឱ្យឆ្លងកាត់ការព្យាបាលយកកោសិកាមហារីកចេញ។
កាលពីប៉ុន្មានថ្ងៃកន្លងទៅថ្មីៗនេះ ស្តេចចុងភៅពិភពលោក Gordon Ramsey បានបង្ហោះរូបភាពចំនួន ២ សន្លឹកលើបណ្ដាញសង្គម Instagram បង្ហាញឱ្យឃើញស្នាមវះកាត់យកកោសិកាមហារីកចេញនៅក្រោមផ្នែកត្រចៀក។ តាមការបង្ហោះ ចុងភៅពិភពលោកដ៏ល្បីវ័យ ៥៨ ឆ្នាំរូបនេះបានទម្លាយថា ក្រុមគ្រូពេទ្យបានធ្វើការវះកាត់យកកោសិកាមហារីកស្បែក basal cell carcinoma ចេញ។
ក្នុងការបង្ហោះនោះ លោកបានរៀបរាប់ថា៖ «ពិតជាអរគុណ និង កោតសរសើរចំពោះក្រុមគ្រូពេទ្យដ៏អស្ចារ្យនៅ The Skin Associates រួមជាមួយនឹងការងារដ៏រហ័សក្នុងការវះកាត់យកកោសិកា basal cell carcinoma នេះចេញ, អរគុណ! សូមកុំភ្លេចលាបឡេការពារកម្ដៅថ្ងៃផងនៅចុងសប្ដាហ៍នេះ»៕
