នៅថ្ងៃទី ១១ ខែកញ្ញា ឆ្នាំ ២០២៥ នេះ នៅប្រទេសចិនកំពុងភ្ញាក់ផ្អើល និង តក់ស្លុតជាខ្លាំង ក្រោយលេចឮដំណឹងចចាមអារ៉ាមមួយថា តារាសម្ដែងប្រុស Yu Menglong បានធ្លាក់ពីលើអគាររហូតបាត់បង់ជីវិតក្នុងវ័យ ៣៧ ឆ្នាំ។ ដំណឹងដ៏តក់ស្លុតនេះដែរ ត្រូវបានចែកចាយដោយ Blogger ចិនល្បីម្នាក់ឈ្មោះ Jiang Xiaoyan ដែលថាលោកទទួលបានដំណឹងពីមិត្តជិតស្និទ្ធរបស់ Yu Menglong។
តាមការរៀបរាប់បានឱ្យដឹងថា នៅយប់ថ្ងៃទី ១០ ខែកញ្ញា ឆ្នាំ ២០២៥ តារាប្រុស Yu Menglong បានចេញទៅញ៉ាំអីជាមួយមិត្តភក្តិ ៥-៦ នាក់នៅក្រុងប៉េកាំង ដោយទីតាំងនៅផ្ទះរបស់មិត្តលោកម្នាក់។ មកដល់វេលាម៉ោង ២ ភ្លឺ ឈានចូលថ្ងៃទី ១១ ខែកញ្ញា ឆ្នាំ ២០២៥ នេះ គ្រប់គ្នាបានទៅបន្ទប់គេងរៀងខ្លួន ហើយ Yu Menglong ក៏បានចូលគេងចាក់សោទ្វារផងដែរ ស្រាប់ដល់ម៉ោង ៦ ព្រឹក មិត្តរបស់លោកបានទៅដាស់ Menglong ឱ្យភ្ញាក់ឡើង តែឃើញលោកតបតឡើយ។
ក្រោយមក មានអ្នកជិតខាងម្នាក់បណ្ដើរឆ្កែដើរលេង ហើយក៏ប្រទះឃើញរាងកាយរបស់ Menglong នៅពីមុខផ្ទះរបស់គេ ហើយក៏រាយការណ៍ទៅប៉ូលិសភ្លាមៗ។ តាមការស៊ើបអង្កេតបឋមនៅកន្លែងកើតហេតុ ប៉ូលិសបានរកឃើញនាឡិកា Rolex របស់មិត្តភក្តិលោក ២ គ្រឿង នៅក្នុងហោប៉ៅអាវរបស់លោក ប៉ុន្តែ ខាងអាជ្ញាធរកំណត់បឋមថា ករណីស្លាប់របស់តារាប្រុសរូបនេះមិនមែនជាករណីឃាតកម្មទេ ទោះជាយ៉ាងណា ករណីស្លាប់របស់តារាប្រុសល្បី Yu Menglong ខាងជំនាញពាក់ព័ន្ធកំពុងបន្តការស៊ើបអង្កេតនៅឡើយ។
បច្ចុប្បន្ន ព័ត៌មានចចាមអារ៉ាមនៃការស្លាប់របស់តារាសម្ដែងប្រុស Yu Menglong បានធ្វើឱ្យមនុស្សជាច្រើនមិនថាក្នុងប្រទេស ឬក្រៅប្រទេសនោះទេ មានការតក់ស្លុតជាខ្លាំង និង កំពុងទន្ទឹងយ៉ាងអន្ទះសារង់ចាំការឆ្លើយតបផ្លូវការពីខាងក្រុមការងាររបស់លោក៕
ប្រភព៖ Kenh14
