សត្វត្រីឆ្លាមពណ៌ទឹកក្រូចចែងចាំងដ៏កម្រមួយក្បាល ត្រូវបានគេប្រទះឃើញកាលពីឆ្នាំទៅនៅក្បែរឧទ្យានជាតិ Tortuguero នាប្រទេស Costa Rica ប៉ុន្តែអ្នកវិទ្យាសាស្ត្រទើបតែបានបញ្ចេញរូបភាពរបស់នាងនៅក្នុង Marine Biology journal ដោយបញ្ជាក់ថានេះជាលើកដំបូងហើយដែលសត្វត្រីឆ្លាមមានពណ៌សម្បុរបែបនេះត្រូវបានប្រទះឃើញនោះ។
រូបភាពនៃត្រីឆ្លាមកម្រនេះត្រូវបានថតកាលពីឆ្នាំទៅ និង បានបង្ហោះលើផេកក្រុមហ៊ុនទេសចរណ៍មួយឈ្មោះ Parisima Domus Dei បង្ហាញឱ្យឃើញអ្នកស្ទូចត្រីមួយចំនួនកំពុងនៅលើទូក ហើយក៏ប្រទះឃើញត្រីពណ៌កម្រមួយក្បាលនេះក្នុងជម្រៅទឹក ៣៧ ម៉ែត្រ។ ពួកគេបាននាំគ្នាថតរូបវា រួចក៏ប្រលែងវាទៅវិញ។
គួរឱ្យដឹងថា សត្វឆ្លាមប្រភេទ nurse គឺឧស្សាហ៍ប្រទះឃើញនៅដែនសមុទ្រអភិរក្សនាប្រទេស Costa Rica ណាស់ ហើយត្រីឆ្លាមកម្រដែលប្រទះឃើញខាងលើនេះគឺទំនងជាកើតមកជាមួយ xanthism ដែលជាស្ថានភាពខុសប្រក្រតីនៃហ្សែនដែលបណ្ដាលឱ្យសត្វបាត់បង់ពណ៌ធម្មជាតិរបស់ខ្លួន និង ធ្វើឱ្យវាប្រែទៅជាពណ៌កម្រដូចជាទឹកក្រូច ឬលឿង។ ជាមួយគ្នានោះដែរ អ្នកវិទ្យាសាស្ត្រក៏កត់សម្គាល់ថាវាក៏អាចកើតមានជំងឺភឿកផងដែរ (albinism)៕
