កាលពីថ្ងៃទី ០៦ ខែកក្កដា ឆ្នាំ ២០២៥ កន្លងទៅ ប៉ូលិសជប៉ុនបានទទួលការរាយការណ៍ពីប្រជាពលរដ្ឋ ក្រោយពួកគេធុំក្លិនស្អុយខ្លាំងចេញពីអាផាតមិនមួយនៅ Toshima ក្រុង Tokyo។ រថយន្តពន្លត់អគ្គិភ័យចំនួន ៣ គ្រឿង រថយន្តសង្គ្រោះបន្ទាន់ ២ គ្រឿង និង ប៉ូលិស ក៏បានចុះទៅដល់ទីតាំងភ្លាមៗដើម្បីស៊ើបអង្កេត។
ទៅដល់កន្លែងកើតហេតុ ប៉ូលិសក៏រកឃើញសាកសពមនុស្សក្នុងសភាពស្អុយរលួយមើលលែងយល់ ហើយក្រោយការស៊ើបសួរ ប៉ូលិសបានឱ្យដឹងថា អាផាតមិនមួយនោះគឺជារបស់តារាសម្ដែងស្រី Tono Nagiko ដោយរូបនាងបានបាត់ខ្លួនទាក់ទងលែងបានរយៈពេលច្រើនថ្ងៃមកហើយ។
តាមការបញ្ជាក់របស់ប៉ូលិស សាកសពនោះបានស្លាប់ច្រើនថ្ងៃមកហើយ សភាពរលួយមើលលែងយល់គឺមិនអាចកំណត់បានឡើយថាសពនោះជានរណា ដោយអាជ្ញាធរមានតែរង់ចាំលទ្ធផល DNA ប៉ុណ្ណោះ។ បន្ថែមពីនេះ នៅទីតាំងកើតហេតុ ប៉ូលិសក៏រកមិនឃើញដាននៃការបំពាន ឬសម្លាប់នោះឡើយ ដូច្នេះប៉ូលិសសង្ស័យថា អ្នកស្លាប់អាចស្លាន់ដោយការឈឺភ្លាមៗ ឬជួបគ្រោះថ្នាក់អ្វីមួយ។
ជាការឆ្លើយតបលើការសង្ស័យថាតារាសម្ដែងស្រី Tono Nagiko បានស្លាប់ទៅហើយនោះ ខាងក្រុមហ៊ុនរបស់នាងបដិសេធមិននិយាយឡើយ ដោយលើកឡើងថាកុងត្រានាងជាមួយក្រុមហ៊ុនបានបញ្ចប់ហើយ។ បច្ចុប្បន្ន មិត្តរួមការងារ ក៏ដូចជាមិត្តជិតស្និទ្ធរបស់នាង មានការព្រួយបារម្ភជាខ្លាំង ព្រោះតែពួកគេមិនអាចទាក់ទង Tono បាន។
គួរឱ្យដឹងថា កាលពីថ្ងៃទី ២៦ ខែមិថុនា ឆ្នាំ ២០២៥ កន្លងទៅ តារាសម្ដែងស្រី Tono Nagiko បានចេញមកទម្លាយថា រូបនាងកើតមានជំងឺផ្លូវចិត្តធ្ងន់ធ្ងរ អមជាមួយរូបភាពរបស់នាងក្នុងសភាពស្គមស្គាំងខ្លាំង។ ក្នុងរយៈពេលប៉ុន្មានឆ្នាំមកនេះ សុខភាពរបស់កំពូលតារាសម្ដែងស្រីជប៉ុនរូបនេះតែងតែធ្វើឱ្យសាធារណជនព្រួយបារម្ភជានិច្ចរហូតដល់ថ្ងៃដែលនាងបាត់ខ្លួនមិនទាន់ដឹងដំណឹងនេះ៕
ប្រភព៖ Kenh14
