បើនិយាយដល់កំពូលតារាសម្ដែងប្រុសដែលមានរូបរាងស្រស់សង្ហា និង ពោរពេញដោយទេពកោសល្យធ្លាប់រញ្ជួយកញ្ចក់ទូរទស្សន៍នៅតៃវ៉ាន់នោះ ប្រាកដណាស់គេប្រាកដជានឹកភ្នកដល់តារាសម្ដែងប្រុស Dylan Kuo រួមនឹងតារាប្រុសល្បីៗមួយចំនួនទៀតដូចជា Jerry Yan, Ming Dao និង Mike He ជាដើម។ Dylan Kuo គឺធ្លាប់ឆក់យកបេះដូងនារីៗជាអ្នកគាំទ្រឱ្យលង់បាក់ស្រឹបនឹងរូបរាងដ៏សង្ហា និង មុខមាត់ដ៏មានមន្តស្នេហ៍របស់លោក ហើយរហូតមកទល់ពេលនេះ ទោះបីជាមានវ័យ ៤៨ ឆ្នាំហើយក្ដី ប៉ុន្តែលោកនៅតែរក្សាភាពសង្ហាដដែលមិនចាស់ទៅតាមវ័យសូម្បីបន្តិច។
ប្រិយមិត្តមួយចំនួនដែលតាមដានខ្សែភាពយន្តចិន និង តៃវ៉ាន់ ប្រាកដជាធ្លាប់ដឹងមកហើយថា តារាសម្ដែងប្រុស Dylan Kuo គឺរក្សាជីវិតឯកជនរបស់លោកស្ងៀមស្ងាត់ខ្លាំង ហើយបើទោះជាចូលប្រឡូកវិស័យសិល្បៈច្រើនឆ្នាំហើយក្ដី លោកគឺកម្រនឹងប្រកាសពីទំនាក់ទំនងជីវិតស្នេហាជាសាធារណៈណាស់។
មកដល់ឆ្នាំ ២០២១ លោកក៏បានធ្វើឱ្យអ្នកគាំទ្រជាច្រើនមានការភ្ញាក់ផ្អើលខ្លាំង នៅពេលដែលលោកចេញមកប្រកាសដំណឹងល្អពីទំនាក់ទំនងស្នេហាជាមួយតារាសម្ដែងស្រី Ma Zhe Han ដែលជាតារាស្រីស្រស់វ័យក្មេងអាយុប្អូនលោករហូតដល់ ១៩ ឆ្នាំឯណោះ។ ក្រោយមកទៀត Dylan Kuo ក៏បានបញ្ចេញកម្រងរូបថតអាពាហ៍ពិពាហ៍មួយចំនួនជាមួយគូដណ្ដឹង រូបទាំងប្រកាសថាបានទិញផ្ទះមួយនៅប៉េកាំង រួមរស់ជាមួយគ្នា ក្រោយរៀបការក្នុងឆ្នាំ ២០២៣។
យ៉ាងណាមិញ ក្រោយរង់ចាំអស់រយៈពេល ២ ឆ្នាំ មហាជនអ្នកគាំទ្រគឺមិនបានឃើញ Dylan Kuo ចាប់ដៃកូនក្រមុំរៀបការតាមសន្យាឡើយ ហើយស្រាប់តែមកដល់ខែកុម្ភៈ ឆ្នាំ ២០២៥ Dylan ក៏ធ្វើឱ្យអ្នកគាំទ្រភ្ញាក់ផ្អើលជាថ្មី នៅពេលលោកចេញមកប្រកាសថា ចំណងស្នេហ៍ជាមួយគូដណ្ដឹង Ma Zhe Han ត្រូវបានបញ្ចប់ហើយ ដោយខាង Ma Zhe Han ក៏បានចេញមកប្រកាសដូចគ្នា ប៉ុន្តែទាំងគូគឺមិនបញ្ជាក់ពីមូលហេតុនៃការបញ្ចប់ចំណងស្នេហ៍នេះឡើយ។
ក្រោយជីវិតស្នេហាមិនសមប្រកប Dylan Kuo ក៏បានវិលត្រឡប់ទៅស្រុកកំណើតងាកចាប់មុខជំនួញកសិកម្មកំដរជីវិតវិញ។ លោកបានជួលស្រះចំនួន ៤០ កន្លែង ក្នុងផ្ទៃដី ២.៦៧ ហិកតា នាខេត្ត Jiangsu ដើម្បីទុកចិញ្ចឹមក្ដាម។ បន្ថែមពីនេះ លោកក៏មានដីស្រែដាំស្រូវសាឡីនៅស្រុកកំណើតរបស់មីងលោកនាខេត្ត Shandong ផងដែរ ដោយដល់រដូវច្រូតកាត់ម្ដងៗ លោកតែងជិះត្រាក់ទ័រទៅប្រមូលផលស្រូវជាមួយសាច់ញាតិជានិច្ច។ តារាប្រុសរូបនេះបាននិយាយថា ការប្រមូលផលស្រូវនេះមិនជួយឱ្យលោកទទួលបានកម្រៃអ្វីឡើយ ប៉ុន្តែវាបានធ្វើឱ្យលោកសប្បាយផ្លូវចិត្ត នៅពេលដែលបានជួបមាមីងសាច់ញាតិនៅស្រុក៕
