នៅថ្ងៃទី ១៧ ខែមីនា ឆ្នាំ ២០២៥ នេះ សារព័ត៌មាន YTN បានចេញផ្សាយថា តារាសម្ដែងស្រី Lee Si Young និង ស្វាមីរបស់នាងលោក Jo បច្ចុប្បន្នដំណើរការនីតិវិធីលែងលះគ្នា។ ពួកគេបានប្រមូលឯកសារសំខាន់ៗដាក់ទៅលើតុលាការ Seoul Family Court កាលពីដើមឆ្នាំនេះ ហើយខណៈលក្ខខណ្ឌចម្បងនៃការលែងលះគ្នាត្រូវបានព្រមព្រៀងរួចហើយនោះ ពួកគេនៅតែរង់ចាំដំណើរការបញ្ចប់ចុងក្រោយប៉ុណ្ណោះ។
គួរឱ្យដឹងថា តារាសម្ដែង Lee Si Young បានរៀបការជាមួយលោក Jo កាលពីឆ្នាំ ២០១៧។ អាពាហ៍ពិពាហ៍របស់ពួកគេគឺទទួលបានការចាប់អារម្មណ៍ពីមហាជនយ៉ាងខ្លាំង ដោយសារតែលោក Jo ជាអ្នកជំនួញផ្នែកភោជនីយដ្ឋានដ៏ជោគជ័យមួយរូប។ ក្រោយរៀបការរួច ពួកគេក៏ទទួលបានកូនប្រុសម្នាក់ជាចំណងដៃ។
ក្នុងដំណើរជីវិតរៀបការរបស់នាងនេះដែរ Lee Si Young ធ្លាប់បានចែករំលែកពីវត្តមានក្រុមគ្រួសាររបស់នាងក្នុងកម្មវិធីកម្សាន្តមួយចំនួនរួមមាន «I Live Alone» និង «Point of Omniscient Interfere» ដែលបង្ហាញឱ្យឃើញពីសេចក្ដីសុខសុភមង្គលក្នុងគ្រួសាររបស់នាង។ យ៉ាងណាមិញ ក្រោយរយៈពេល ៨ ឆ្នាំ ប្ដីប្រពន្ធរបស់ពួកគេក៏បានសម្រេចចិត្តដើរផ្លូវរៀងខ្លួន។
តារាសម្ដែង Lee Si Young បានចូលប្រឡូកវិស័យសិល្បៈដំបូងក្នុងឆ្នាំ ២០០៨ និង ផ្ទុះប្រជាប្រិយភាពមានមហាជនស្គាល់ច្រើនតាមរយៈខ្សែភាពយន្តរឿង «Boys Over Flowers» និង កម្មវិធីកម្សាន្ត «We Got Married»។ រឿងភាគចុងក្រោយរបស់នាងដែលផ្ទុះល្បីខ្លាំងគឺរឿង «Sweet Home» ដែលបានចាក់បញ្ចាំងផ្សាយកាលពីឆ្នាំទៅ៕
