តារាសម្ដែងស្រីចិន Chen Sisi ដែលផ្ទុះប្រជាប្រិយភាពក្នុងការដើរជាតួអង្គអ្នកម្នាង ឆាវ ប្រចាំភាពយន្តភាគចិនដ៏ល្បី «Legend of Zhen Huan» ឬជាភាសាខ្មែរ «អ្នកម្នាង ជិនហួ» ថ្មីៗនេះកំពុងរងមតិរិះគន់វែកញែកខ្លាំង ក្រោយរូបនាងត្រូវបានគេចោទប្រកាន់ថាបានឡាយលក់កាបូប LV ក្លែងក្លាយ។
តាមការចេញផ្សាយដោយសារព័ត៌មានចិនបានឱ្យដឹងថា មានភ្ញៀវម្នាក់បានទិញកាបូប LV មួយតឹកពីតារាស្រី Chen Sisi តាមឡាយ ប៉ុន្តែពេលអីវ៉ាន់មកដល់គឺមានសភាពខុសគ្នាទៅនឹងរូបបង្ហាញលើអនឡាញ។
ដោយសង្ស័យថាកាបូបនោះជារបស់ក្លែងក្លាយ ភ្ញៀវរូបនោះក៏បានយកកាបូបដែលទិញទៅឱ្យខាងភ្នាក់ងារពិនិត្យមើលរបស់ពិតដើម្បីឱ្យជួយមើលកាបូបរបស់នាង។ ក្នុងនោះដែរ មានអ្នកជំនាញ ២ នាក់នៅងឿងឆ្ងល់ចំពោះភាពពិតរបស់វា ខណៈអ្នកជំនាញម្នាក់ទៀតអះអាងតែម្ដងថាជារបស់ក្លែងក្លាយ។ ភ្ញៀវរូបនោះបានស្នើសុំឱ្យសងជាលុយមកវិញ ដោយចុងក្រោយក៏ទទួលបានក្រោយការទាក់ទងគ្នាអស់ជាច្រើនលើក។
ក្រោយមានហេតុការណ៍បែបនេះកើតឡើង ខាងតារាស្រី Chen Sisi ក៏បានធ្វើការចេញមុខឆ្លើយតបដោយប្រមូលក្រុមការងាររបស់នាងឱ្យស៊ើបអង្កេតលើការចោទប្រកាន់របស់ភ្ញៀវខាងលើ។ តាមការអះអាងរបស់នាង ខាងក្រុមការងារបានពិនិត្យឃើញថាកាបូបដែលដាក់លក់គឺមានឈីប និង មាន serial number ត្រឹមត្រូវដែលបញ្ជាក់ថាជារបស់ពិតមិនក្លែងក្លាយ។
បន្ថែមពីនេះ Chen Sisi ក៏បានទាក់ទងទៅខាងភ្នាក់ងារត្រួតពិនិត្យប៉ុន្តែរកមិនឃើញឯកសារផ្លូវការណាគាំទ្រការអះអាងរបស់ភ្ញៀវរូបនោះឡើយ។ គួរបញ្ជាក់ថា នៅក្នុងប្រទេសចិន ប្រសិនបើមានរបស់ណារកឃើញថាជារបស់ក្លែងក្លាយនោះគឺមានចេញលិខិតបញ្ជាក់ត្រឹមត្រូវថាពិតជារបស់ក្លែងក្លាយមែន។
បើទោះជាចេញមុខអះអាងការពារខ្លួនក៏ពិតមែន ប៉ុន្តែ Chen Sisi នៅតែមានមហាជនជាច្រើនមិនជឿលើការបកស្រាយរបស់នាងដដែល ដោយខ្លះបានចេញមកចោទប្រកាន់នាងថាបានលក់របស់ក្លែងក្លាយបែបនេះមួយរយៈមកហើយ ខណៈអ្នកខ្លះទៀតមិនជឿថាជារបស់ពិតព្រោះតែនាងដាក់លក់ក្នុងតម្លៃថោកពេក៕
ប្រភព៖ 8days
