នៅថ្ងៃទី ១៧ ខែមេសា ឆ្នាំ ២០២៥ នេះ សារព័ត៌មាន Hochi News បានចេញផ្សាយព័ត៌មានដ៏គួរឱ្យភ្ញាក់ផ្អើលមួយ ដោយក្រុមគ្រួសាររបស់តារាសម្ដែងប្រុសវ័យក្មេង Itagaki Mizuki ប្រកាសថា តារាប្រុសរូបនេះបានទទួលមរណភាពទៅហើយក្នុងវ័យត្រឹម ២៤ ឆ្នាំ។
តាមការបញ្ជាក់ពីសាច់ញាតិបានឱ្យដឹងថា លោក Itagaki Mizuki បានស្លាប់ក្នុងហេតុការណ៍មិនរំពឹងទុកមួយដោយសាកសពរបស់លោកត្រូវបានប៉ូលិសរកឃើញនៅក្រុងតូក្យូ ក្រោយបាត់ខ្លួនគ្មានដំណឹងរយៈពេល ៤ ខែមកនេះ។
សាច់ញាតិបានឱ្យដឹងទៀតថា លោក Mizuki មុនលាចាកលោកទៅនេះ គឺលោកបានកើតមានជំងឺផ្លូវចិត្ត ដោយកាលពីដើមឆ្នាំកន្លងទៅ លោកបានបាត់ខ្លួនភ្លាមៗ ផ្ដាច់ការទាក់ទងជាមួយសាច់ញាតិ និង មិត្តភក្តិ។ ក្រុមគ្រួសារ និង ខាងអាជ្ញាធរបានធ្វើការតាមរកលោករាប់ខែមកហើយ ដោយជាអកុសលពេលរកឃើញបែរជាឃើញលោកក្នុងសភាពបែបនេះទៅវិញ។
ដំណឹងមរណភាពរបស់តារាប្រុសរូបសង្ហា Itagaki Mizuki បានធ្វើឱ្យសាធារណជននៅជប៉ុនតក់ស្លុតចិត្តជាខ្លាំង។ មហាជនជាច្រើនបានសម្ដែងការរំលែកទុក្ខចំពោះក្រុមគ្រួសារលោក និង សម្ដែង្រសោកស្ដាយចំពោះការបាត់បង់តារាប្រុសដែលស្រស់សង្ហា និង មានទេពកោសល្យមួយរូបនេះ៕
