តារារ៉េបដ៏ល្បីនៅអាមេរិក Lil Nas X ដែលផ្ទុះប្រជាប្រិយភាពខ្លាំងលើបទ «Old Town Road» ថ្មីៗនេះ ត្រូវបានប៉ូលិសចាប់ខ្លួនក្រោយរូបលោកប៉ះទង្គិចគ្នាជាមួយប៉ូលិសនៅតាមផ្លូវនៅ Los Angeles ទាំងខ្លួនននលគកស្លៀកតែលីអូពណ៌សមួយ និង ពាក់ស្បែកជើង cowboy។
តាមសារព័ត៌មាន AP បានឱ្យដឹងថា ប៉ូលិសក្រុង Los Angeles បានប្រទះឃើញ Lil Nas X នៅលើមហាវិថី Ventura ដែលធម្មតាជាទីតាំងមានមនុស្សកកកុញនៅ Studio City វេលាម៉ោងប្រមាណជា ៦ ព្រឹកថ្ងៃទី ២១ ខែសីហា ឆ្នាំ ២០២៥ (ពេលវេលាក្នុងតំបន់)។ ដោយឡែកបើតាមវីដេអូបង្ហោះលើ TMZ តារារ៉េបវ័យ ២៦ ឆ្នាំរូបនេះត្រូវបានគេដឹងថាកំពុងធ្វើដំណើរទៅពិធីជប់លៀងមួយ ដោយឃើញមានច្រៀង រាំបញ្ចេញកាយវិការដាក់កាមេរ៉ា ប៉ុន្តែនៅមុននោះ ខាងអាជ្ញាធរទទួលបានការរាយការណ៍ថា មានមនុស្សប្រុសននលគកម្នាក់កំពុងដើរនៅតាមផ្លូវ។
Lil Nas X ក្រោយមកក៏ត្រូវបានចាប់ខ្លួនក្រោយមានការបំពានប៉ះទង្គិចទៅលើប៉ូលិស ប៉ុន្តែយ៉ាងណា ប៉ូលិសសង្ស័យថាលោកប្រើថ្នាំជ្រុល ដូចនេះក៏បាននាំទៅកាន់មន្ទីរពេទ្យពិនិត្យជាមុនសិន នេះបើតាមការបញ្ជាក់ពីមន្ត្រីប៉ូលិសម្នាក់។ ពាក់ព័ន្ធនឹងស្ថានភាពបន្ថែមរបស់ Lil Nas X គឺមិនត្រូវបានបញ្ចេញនោះឡើយ ដោយគ្រាន់តែដឹងថា លោកត្រូវបានយកចេញពីមន្ទីរពេទ្យហើយ និង កំពុងឃុំខ្លួននៅ Valley Jail ក្បែរទីតាំងដែលប៉ូលិសរកឃើញលោកនោះ៕
