តារាទូរទស្សន៍ និង ជាម៉ូដែលស្រីសញ្ជាតិអូស្ត្រាលីម្នាក់ឈ្មោះ Tamika Sueann-Rose Chesser ថ្មីៗកន្លងទៅនេះត្រូវបានប៉ូលិសចាប់ខ្លួនពាក់ព័ន្ធករណីមនុស្ស-ឃាត នេះបើតាមការចេញផ្សាយរបស់សារព័ត៌មាន New York Post។
តាមព័ត៌មានបានឱ្យដឹងថា តារាស្រីវ័យ ៣៤ ឆ្នាំរូបនេះ រងការចោទប្រកាន់ថាបានសម្លាប់មិត្តប្រុសរបស់ខ្លួនឈ្មោះ Julian Story យ៉ាងព្រៃផ្សៃ ដោយកាត់ក្បាល និង ដុតបំផ្លាញរាងកាយចោល។ រាងកាយដែលបានឆេះមើលលែងយល់របស់ Julian ត្រូវបានរកឃើញនៅក្នុងបន្ទប់ទឹកនៃអាផាតមិនមួយក្នុងក្រុង Port Lincoln ប្រទេសអូស្ត្រាលី កាលពីថ្ងៃទី ១៧ ខែមិថុនា ឆ្នាំ ២០២៥ កន្លងទៅ ខណៈក្បាលរបស់លោកបានបាត់ចេញពីខ្លួនរកមិនទាន់ឃើញនៅឡើយ។
តាមឯកសាររបស់តុលាការ ម៉ូដែលស្រី Tamika Sueann-Rose Chesser ត្រូវបានគេប្រទះឃើញនៅសួនច្បារខាងក្រោយទីតាំងកើតហេតុ ហើយក៏ត្រូវប៉ូលិសចាប់ខ្លួនភ្លាមៗ និង ចោទប្រកាន់បន្ថែមលើករណៅបំផ្លាញសាកសព និង បង្កហិង្សាលើប៉ូលិស។ ជាមួយគ្នានោះ ប៉ូលិសក៏បានទម្លាយវីដេអូពីកាមេរ៉ាសុវត្ថិភាពនៃស្ត្រីម្នាក់ដែលជឿថាជានាង Tamika Sueann-Rose Chesser បង្ហាញខ្លួនក្រោយកើតហេតុនៅយប់ថ្ងៃទី ១៧ ខែមិថុនា។ ស្ត្រីដែលជឿថាជានាង Tamika នោះស្ថិតក្នុងឈុតពណ៌ខ្មៅ ដើរបណ្ដើរឆ្កែ ៣ ក្បាលនៅតាមផ្លូវ។
គួរឱ្យដឹងថា ក្រោយការចាប់ខ្លួន នាង Tamika គឺមិនអនុញ្ញាតឱ្យមានការធានាឱ្យនៅក្រៅឃុំឡើយ។ ក្នុងការឆ្លើយតបនឹងអ្នកកាសែត បងស្រីរបស់នាងបានទទូចថា៖ «នេះមិនមែនជា Tamika ពិតប្រាកដឡើយ។ នាងកើតមានការប៉ះទង្គិច និង ត្រូវគេធ្វើបាបពេញមួយជីវិតហើយរហូតធ្វើឱ្យនាងឈានដល់ស្ថានភាពផ្លូវចិត្តមិននឹងនរ»។ គួរបញ្ជាក់ថា នាង Tamika Sueann-Rose Chesser នឹងត្រូវឡើងតុលាការក្នុងខែធ្នូ ឆ្នាំ ២០២៥ នេះ៕
ប្រភព៖ Kenh14
