ដូចដែលប្រិយមិត្តមួយចំនួនបានដឹងរួចមកហើយថា កាលពីខែធ្នូ ឆ្នាំ ២០២៤ កន្លងទៅ តារាចម្រៀងស្រី Selena Gomez បានប្រកាសជាសាធារណៈពាក់ចិញ្ចៀនភ្ជាប់ពាក្យជាមួយលោក Benny Blanco ប្ដូរឈ្មោះជាគូដណ្ដឹងនឹងគ្នា ក្រោយទាក់ទងមើលចិត្តថ្លើមគ្នាអស់រយៈពេល ១ ឆ្នាំ។ ចាប់តាំងពីពេលនោះមក អ្នកគាំទ្រគូស្នេហ៍តារាមួយគូនេះគឺតែងទន្ទឹងរង់ចាំដល់ថ្ងៃមង្គលរបស់ពួកគេ ហើយការទន្ទឹងនេះដែរកំពុងក្លាយជាការពិតហើយ ដោយអ្នកគាំទ្ររកឃើញថា Selena កំពុងរៀបចំត្រៀមសម្រាប់ថ្ងៃពិសេសជាមួយគូដណ្ដឹង ដោយទីតាំង និង ភ្ញៀវដែលចូលរួមខ្លះក៏ត្រូវបានទម្លាយខ្លះៗផងដែរ។
ជាក់ស្ដែង តាមព័ត៌មានទទួលបានពីសារព័ត៌មាន Daily Mail បានឱ្យដឹងថា ពិធីមង្គលការរបស់តារាចម្រៀង Selena Gomez និង គូដណ្ដឹង Benny Blanco គឺកាន់តែខិតជិតមកដល់ហើយ។ ប្រភពជិតដិតមួយបានបញ្ជាក់ថា គូស្នេហ៍តារាល្បីមួយគូនេះគ្រោងរៀបចំពិធីមង្គលការរយៈពេល ២ ថ្ងៃនៅវីឡាប្រណីតតម្លៃ ៣៥ លានដុល្លាររបស់ពួកគេនៅរដ្ឋ California សហរដ្ឋអាមេរិក ក្នុងខែកញ្ញា ឆ្នាំ ២០២៥ ខាងមុខនេះ។
ពួកគេសង្ឃឹមថា ថ្ងៃពិសេសរបស់គេនឹងពោរពេញដោយភាពកក់ក្ដៅ មានភាពឯកជន និង ការចូលរួមពីសំណាក់អ្នកដែលជិតដិតទាំងអស់។ ប្រភពខាងលើដដែលបានបន្តទៀតថា តារាចម្រៀង Ed Sheeran គឺ comfirm មុនគេជាភ្ញៀវម្នាក់ក្នុងពិធីមង្គលការ Selena Gomez និង Benny Blanco ហើយដោយឡែកចំពោះ Taylor Swift វិញ គឺមិនមានការទម្លាយឱ្យច្បាស់ថានឹងចូលរួមឬក៏អត់នោះដែរ។
ដំណឹងទម្លាយពីពិធីរៀបមង្គលការរបស់តារាចម្រៀងស្រី Selena Gomez និង អនាគតស្វាមី Benny Blanco នេះដែរគឺទទួលបានការចាប់អារម្មណ៍យ៉ាងខ្លាំងពីសាធារណជន ហើយពួកគេក៏បានបង្ហាញក្ដីរំភើបជំនួស និង បានអបអរដល់តារាក្នុងដួងចិត្តមហាជនមួយគូនេះផងដែរ៕
ប្រភព៖ Kenh14
