ថ្មីៗនេះ នាវាទេសចរណ៍ខ្នាតយក្សមួយគ្រឿងបានជួបប្រទះនឹងរលកធំវាយប្រហារខណៈធ្វើដំណើរជុំវិញប្រទេស New Zealand បង្កឱ្យកប៉ាល់ផ្អៀងក្រឡក ខូចខាតអីវ៉ាន់ជាច្រើនខណៈមនុស្សយ៉ាងហោចណាស់ ១៦ នាក់បានរងរបួស នេះបើតាមការចេញផ្សាយរបស់សារព័ត៌មាន New York Post។
កប៉ាល់ទេសចរណ៍ខ្នាតយក្ស The Crown Princess បានធ្វើដំណើរចាកចេញពីក្រុងស៊ីដនី ប្រទេសអូស្ត្រាលី កាលពីថ្ងៃទី ២៥ ខែកុម្ភៈ ឆ្នាំ ២០២៥ កន្លងទៅ ក្នុងដំណើរកម្សាន្តលើទឹករយៈពេល ២ សប្ដាហ៍។ យ៉ាងណាមិញ មកដល់ចុងសប្ដាហ៍កន្លងទៅ កប៉ាល់មួយគ្រឿងនេះបានពើបប្រទះនឹងអាកាសធាតុអាក្រក់រហូតធ្វើឱ្យកប៉ាល់ត្រូវផ្អៀង ១៤ ដឺក្រេ ដោយសារតែកម្លាំងខ្យល់បោកបក់ខ្លាំងបូករួមទាំងរលកធំៗ ធ្វើឱ្យមនុស្សជាច្រើននៅលើកប៉ាល់មិនអាចទប់លំនឹងត្រូវដួលរងរបួស។
ទិដ្ឋភាពស្ដែងៗដែលថតបានក្នុងផ្ទះបាយនៃកប៉ាល់បង្ហាញឱ្យឃើញភាពចលាចល ចានកែវរួមនឹងរបស់របរផ្សេងទៀតត្រូវបានរលំបែកខ្ចាត់ខ្ចាយ ខណៈទឹកនៅក្នុងអាងលើកប៉ាល់ក៏បានហៀរចេញដោយសារកប៉ាល់ផ្អៀងខ្លាំងដោយកម្លាំងរលកបោកផងដែរ។
គួររំឭកថា កប៉ាល់ទេសចរណ៍ The Crown Princess អាចដឹកអ្នកដំណើរបានរហូតដល់ ៣០៨០ នាក់ និង បុគ្គលិក ១២០០ នាក់។ ចំពោះតម្លៃដំណើរកម្សាន្តរយៈពេល ៧ ថ្ងៃលើកប៉ាល់នេះដែរគឺមានចន្លោះពី ១ ពាន់ដុល្លារដល់ ៥ ពាន់ដុល្លារ៕
