ភូមិទេសចរណ៍មួយកន្លែងនៅប្រទេសចិន បានចេញមុខសុំទោសក្រោយរងមតិរិះគន់លើបណ្ដាញសង្គមពីភ្ញៀវទេសចរដែលចេញមុខទម្លាយថា ខាងទីតាំងទេសចរណ៍មួយកន្លែងនោះបានប្រើប្រាស់សំឡី និង ទឹកសាប៊ូមកបង្កើតជាព្រិលក្លែងក្លាយបោកប្រាស់មហាជន។
ភូមិទេសចរណ៍នោះដែរជាភូមិព្រិលទឹកកក Chengdu ដែលមានទីតាំងនៅភាគនិរតីខេត្ត Sichuan ប្រទេសចិន។ កម្រងរូបភាពជាច្រើននៃទិដ្ឋភាពភូមិដែលគ្របដណ្ដប់ដោយព្រិលក្រាស់ៗសក្បុស ត្រូវបានបង្ហោះលើបណ្ដាញសង្គមក្នុងបំណងផ្សព្វផ្សាយទាក់ទាញភ្ញៀវឱ្យទៅទស្សនាអំឡុងពេលបុណ្យចូលឆ្នាំចិន។
យ៉ាងណាមិញ ភ្ញៀវដែលទៅលេងបែរជាបង្ហាញអារម្មណ៍ខកចិត្តខ្លាំងព្រោះតែទិដ្ឋភាពភូមិដែលមានព្រិលគ្របដណ្ដប់សក្បុសនោះ តាមពិតជាព្រិលក្លែងក្លាយដែលគេយកសំឡីមកដាក់បន្លំសោះ។ ក្រោយបែកធ្លាយគ្រប់យ៉ាង ខាងភូមិទេសចរណ៍ខាងលើក៏បានចេញមកសុំទោសដោយលើកហេតុផលថា ដោយសារអាកាសធាតុក្ដៅធ្វើឱ្យព្រិលធ្លាក់មកក្នុងរូបភាពមិនដូចអ្វីដែលពួកគេរំពឹងទុក ទើបពួកគេសម្រេចប្រើវិធីសាស្ត្រនេះ។
ដោយឡែក ក្រោយទទួលបានមតិរិះគន់ពីមហាជនជាច្រើន ខាងភូមិក៏បានធ្វើការសម្អាតព្រិលសំឡីក្លែងក្លាយនោះចេញ ហើយភូមិក៏បានបិទមិនឱ្យចូលទស្សនា រួមទាំងផ្ដល់ប្រាក់សំណងដល់ភ្ញៀវដែលមកលេងពីមុនផងដែរ៕
