លោក Bob Bryar អតីតដៃស្គរប្រចាំក្រុម My Chemical Romance ត្រូវបានប្រទះឃើញស្លាប់ក្នុងផ្ទះរបស់លោកនារដ្ឋ Tennessee សហរដ្ឋអាមេរិក កាលពីថ្ងៃទី ២៦ ខែវិច្ឆិកា ឆ្នាំ ២០២៤ កន្លងទៅ នេះបើតាមការចេញផ្សាយរបស់សារព័ត៌មាន TMZ នៅថ្ងៃទី ២៨ ខែវិច្ឆិកា។
ចំពោះព័ត៌មានលម្អិតជុំវិញការស្លាប់របស់សិល្បកររូបនេះមិនត្រូវបានទម្លាយបញ្ជាក់នោះឡើយ គ្រាន់តែដឹងថាសាកសពរបស់លោកត្រូវបានប្រទះឃើញនៅក្នុងផ្ទះខ្លួនឯងក្នុងសភាពហើមស្អុយរលួយមើលលែងយល់ទៅហើយ ក្រោយគ្មាននរណាបានដឹងបានឮពីលោកក្នុងពេលប៉ុន្មានសប្ដាហ៍កន្លងមកនេះ។
លោក Bob ត្រូវបានឃើញនៅរស់រានមានជីវិតជាលើកចុងក្រោយកាលពីថ្ងៃទី ០៤ ខែវិច្ឆិកា ឆ្នាំ ២០២៤ កន្លងទៅ ហើយបើតាមការធ្វើកោសល្យវិច័យជាបឋមមិនមានការបង្ហាញថាជាករណីឃាតកម្មនោះឡើយ។ យ៉ាងណាមិញ ខាងគ្រូពេទ្យនៅបន្តស៊ើបរកមូលហេតុពិតប្រាកដបណ្ដាលឱ្យតារាប្រុសរូបនេះបាត់បង់ជីវិតផងដែរ។
គួរបញ្ជាក់ថា លោក Bob Bryar បានកើតក្នុងទីក្រុង Chicago ក្នុងឆ្នាំ ១៩៧៩។ លោកបានចាប់ផ្ដើមលេងវាយស្គរតាំងពីនៅក្មេងវ័យមកម្ល៉េះ។ ចាប់អាជីពដំបូងជាវិស្វករផ្នែកសំឡេង និង អ្នកគ្រប់គ្រង tour លោក Bob បានផ្លាស់ទៅធ្វើជាតន្ត្រីករវិញក្រោយជួបជាមួយសមាជិកក្រុម My Chemical Romance ក្នុងឆ្នាំ ២០០៤។ លោកបានចូលក្នុងក្រុមមួយនេះអំឡុងពេលធ្វើការប្រគំតន្ត្រីនៅប្រទេសជប៉ុន ដោយធ្វើជាដៃស្គរជំនួសលោក Matt Pelissier និង បន្តក្នុងក្រុមអស់រយៈពេល ៦ ឆ្នាំ។
បន្ទាប់មកក្រោយចេញពីក្រុម លោក Bob ក៏ងាកមកធ្វើក្នុងវិស័យតន្ត្រិដដែលប៉ុន្តែជាអ្នកជួយលើការរៀបចំ tours ឱ្យតារាមួយចំនួន ហើយក្នុងរយៈពេលប៉ុន្មានឆ្នាំថ្មីៗនេះ លោកមិនសូវបានបង្ហាញខ្លួននោះឡើយដោយប្រើប្រាស់ជីវិតរស់នៅយ៉ាងសាមញ្ញធម្មតា៕
ប្រភព៖ NDTV
