នៅថ្ងៃទី ២១ ខែតុលា ឆ្នាំ ២០២៥ នេះ ស្ត្រីជនជាតិកូរ៉េខាងត្បូងម្នាក់អាយុខ្ទង់ ៣០ ឆ្នាំ បានធ្លាក់ពីលើបង្អួចអគារស្នាក់នៅរបស់ខ្លួនរហូតបាត់បង់ជីវិត ក្រោយជួយសង្គ្រោះកូនតូចរបស់នាងដោយសុវត្ថិភាពពីអគារកំពុងឆេះ ក្រោមស្នាដៃរបស់អ្នកជិតខាង។
តាមប៉ុស្តិ៍ប៉ូលិសនៅ Osan បានឱ្យដឹងថា អគ្គិភ័យបានឆាបឆេះឡើងកាលពីថ្ងៃទី ២០ ខែតុលា ឆ្នាំ ២០២៥ កន្លងទៅ វេលាម៉ោងប្រមាណ ៥ និង ៣៥ នាទីព្រឹក (ពេលវេលាក្នុងតំបន់) នៅអគារស្នាក់នៅកម្ពស់ ៥ ជាន់មួយកន្លែងនៅក្រុង Osan ខេត្ត Gyeonggi។ ភ្លើងឆាបឆេះដំបូងចេញពីជាន់ទី ២ ដោយមានស្ត្រីរស់នៅក្នុងអគារម្នាក់ព្យាយាមសម្លាប់សត្វកន្លាតមួយក្បាលដោយប្រើដែកកេះ និង ថ្នាំបាញ់សម្លាប់សត្វល្អិត តាមអ្វីដែលនាងឃើញតាម Youtube។ យ៉ាងណាមិញ ភ្លើងក៏បានឆាបឆេះឡើងរហូតគ្រប់គ្រងលែងបានរាលដាលទៅដល់ជាន់ផ្សេងៗទៀត។
ភ្លាមៗ ក៏មានការជម្លៀសមនុស្សចេញពីអគារ ហើយក៏មានគ្រួសារមួយរស់នៅជាន់ទី ៥ (ប្ដីប្រពន្ធ និង កូនតូចអាយុ ២ ខែ) ក៏បានព្យាយាមគេចចេញដូចគ្នាតាមបង្អួចផ្ទះ។ ពួកគេបានហុចកូនតូចមុនតាមបង្អូចទៅឱ្យអ្នកជាប់អគារជាមួយគ្នា ប្ដីប្រពន្ធកើតព្យាយាមចេញតាមក្រោយ បុរសជាប្ដីចេញបានដោយសុវត្ថិភាព ប៉ុន្តែប្រពន្ធក៏ជួបគ្រោះថ្នាក់ធ្លាក់ពីបង្អួចរហូតរងរបួសធ្ងន់ធ្ងរ។
នាងត្រូវបានបញ្ជូនទៅកាន់មន្ទីរពេទ្យដែលនៅជិតបំផុត ប៉ុន្តែជាអកុសលត្រូវក្រុមគ្រូពេទ្យប្រកាសស្លាប់ដោយសាររបួសធ្ងន់ធ្ងរពេក។ តាមការស៊ើបអង្កេតរបស់ប៉ូលិសបានទម្លាយថា ជនរងគ្រោះ និង ក្រុមគ្រួសារមិនអាចរត់គេចតាមជណ្ដើរអាសន្នបាន ព្រោះតែភ្លើងឆេះជះផ្សែងខ្មួលខ្មាញ់ខ្លាំងពេកខ្លាចប៉ះពាល់ដល់កូនតូច ទើបសម្រេចគេចតាមបង្អួចបែបនេះ។ តាមរបាយការណ៍គឺមិនមាននរណាគ្រោះថ្នាក់ដល់ជីវិតទៀតឡើយ ប៉ុន្តែមានមនុស្ស ៨ នាក់ឈ្លក់ផ្សែង កំពុងទទួលការព្យាបាល៕
