កាលពីថ្ងៃទី ០១ ខែកញ្ញា ឆ្នាំ ២០២៥ កន្លងទៅ ចលនារំដោះប្រជាជនស៊ូដង់ (SLM) បានឱ្យដឹងថា នៅថ្ងៃទី ៣១ ខែសីហា ឆ្នាំ ២០២៥ មានគ្រោះរអិលបាក់ដីទ្រង់ទ្រាយធំ និង អាក្រក់បំផុតមួយបានកើតឡើងលើភូមិ Tarasin នាតំបន់ភ្នំ Marra ភាគខាងលិចតំបន់ Darfur រហូតគ្របដណ្ដប់លើភូមិជិតទាំងស្រុង។
គ្រោះរអិលបាក់ដីនេះដែរកើតមានឡើងក្រោយមានភ្លៀងធ្លាក់ខ្លាំងប៉ុន្មានថ្ងៃជាប់គ្នា។ តាមព័ត៌មានទទួលបានបឋមបង្ហាញថា ភូមិទាំងមូលដែលមានមនុស្សរស់នៅប្រមាណជាង ១ ពាន់នាក់ត្រូវបាត់បង់ជីវិតទាំងអស់ ដោយមានតែមនុស្សម្នាក់ប៉ុណ្ណោះដែលសំណាងនៅមានជីវិតរស់រាន។
ជាមួយគ្នានោះដែរ ខាងកងកម្លាំងចលនារំដោះប្រជាជនស៊ូដង់បានធ្វើការអំពាវនាវដល់អង្គការសហប្រជាជាតិ និង អង្គការជំនួយអន្តរជាតិផ្សេងៗ ផ្ដល់ជាកម្លាំងជួយរុករកសាកសពជនរងគ្រោះដែលកំពុងជាប់កប់ក្រោមគំនរផ្ទះ និង ភក់ជ្រាំ។ យ៉ាងណាមិញ ដោយសារតែប្រទេសស៊ូដង់កំពុងមានជម្លោះស៊ីវិល ធ្វើឱ្យខាងភ្នាក់ងារជំនួយអន្តរជាតិមិនអាចចូលទៅជួយសង្គ្រោះបានឡើយ។
គួរបញ្ជាក់ថា សង្គ្រាមស៊ីវិលនៅស៊ូដង់កើតមានឡើងតាំងពីខែមេសា ឆ្នាំ ២០២៣ មកម្ល៉េះ ដោយសារការតស៊ូអំណាចរវាងមេទ័ព Abdel Fattah al-Burhan និង Mohamed Hamdan Daglo មេបញ្ជាការកងកម្លាំងប្រដាប់អាវុធរហ័ស (RSF) និង អតីតអនុប្រធានរបស់លោក Burhan។ ខាងកងកម្លាំងចលនារំដោះប្រជាជនស៊ូដង់ ភាគច្រើនជៀសពីការប្រយុទ្ធ ប៉ុន្តែពួកគេនៅកាន់កាប់តំបន់ខ្លះនៅជួរភ្នំខ្ពស់ៗក្នុងប្រទេស៕
ប្រភព៖ VN Express
