រឿងរ៉ាវដ៏រន្ធត់មួយបានកើតមានឡើងក្នុងប្រទេសជប៉ុន ដោយនារីវ័យ ២០ ឆ្នាំម្នាក់ឈ្មោះ Asahi Okazaki បានបាត់ខ្លួនទៅកាលពីខែធ្នូ ឆ្នាំ ២០២៤ កន្លងទៅ ក្រោយរូបនាងត្រូវបានអតីតសង្សារតាមដានជាប់ ស្រាប់តែថ្មីៗនេះគេបានរកឃើញសាកសពរបស់នាងនៅក្នុងផ្ទះអតីតសង្សាររូបនោះ។
តាមព័ត៌មានបានឱ្យដឹងថា នារីរងគ្រោះ និង អតីតគូស្នេហ៍ធ្លាប់បានរស់នៅផ្ទះជាមួយគ្នា រហូតពួកគេសម្រេចចែកផ្លូវគ្នាដោយសារតែអំពើហិង្សាក្នុងគ្រួសារធ្ងន់ធ្ងរពេក។ យ៉ាងណាមិញ បើទោះជាចែកផ្លូវគ្នាដើររៀងខ្លួនហើយនោះ បុរសជាសង្សារចាស់គឺមិនព្រមឱ្យនាងរស់ស្រួលឡើយ គឺរូបគេនៅបន្តតាមបន្លាចជីវិតរបស់នាងជាប់រហូតដល់ថ្ងៃដែលនាងបាត់ខ្លួន។
មុនពេលបាត់ខ្លួនលែងមានដំណឹង Asahi គឺរស់នៅជាមួយលោកយាយរបស់នាង ហើយបើតាមសមាជិកក្រុមគ្រួសារនាងបានប្រាប់ដែរថា នាងធ្លាប់បានទូរស័ព្ទទៅប៉ូលិសដល់ទៅ ៩ ដង។ នាងទូរស័ព្ទទៅប៉ូលិសដំបូងនៅខែវិច្ឆិកា ឆ្នាំ ២០២៤ ក្រោយអតីតសង្សារនាងតាម stalk នាងខ្លាំងទៅៗ ដោយរំខាន និង ប៉ះពាល់ជីវិតប្រចាំថ្ងៃរបស់នាងយ៉ាងខ្លាំង។ អ្វីដែលរន្ធត់ជាងនេះទៅទៀតនោះ សារចុងក្រោយដែលនាងបានផ្ញើទៅឱ្យម្ដាយគឺសរសេររៀបរាប់ថា៖ «គេនៅក្បែរៗនេះ ខ្ញុំអាចនឹងត្រូវគេសម្លាប់»។
ក្រោយមក អតីតសង្សាររបស់ Asahi ឈ្មោះ Shirai Hideyuki ក៏ត្រូវបានប៉ូលិសស៊ើបអង្កេតពាក់ព័ន្ធនឹងការតាម stalk មនុស្សស្រី ដោយជាលទ្ធផលគេក៏បានប្រទះឃើញសាកសពរបស់ Asahi ក្នុងសភាពស្អុយរលួយនៅក្នុងផ្ទះរបស់ជនសង្ស័យនៅថ្ងៃទី ៣០ ខែមេសា ឆ្នាំ ២០២៥ កន្លងទៅ។ តាមការប៉ាន់ស្មានរបស់ប៉ូលិស នារីរងគ្រោះអាចនឹងត្រូវគេសម្លាប់យ៉ាងហោចណាស់តាំងពី ១ ខែមុន ទើបសាកសពរបស់នាងគឺរលួយខ្លាំងរហូតដល់ឃើញឆ្អឹងច្បាស់ៗ។ ដោយសារតែសភាពសាកសពរលួយខ្លាំង ប៉ូលិសគឺមិនទាន់អាចបញ្ជាក់ថាជនរងគ្រោះស្លាប់ដោយសារអ្វីនោះឡើយនៅពេលនេះ ដោយគ្រាន់តែគេរកឃើញមានស្នាមដុតលើរាងកាយនាង។
យ៉ាងណាមិញ អាជ្ញាធរនៅបន្តស៊ើបអង្កេតនៅឡើយដើម្បីបញ្ជាក់ថាតើ Asahi ត្រូវបានគូស្នេហ៍ដុតរាងកាយមុន ឬក្រោយការស្លាប់របស់នាង។ គួរឱ្យដឹងថា ជនសង្ស័យជាអតីតសង្សារត្រូវបានចាប់ខ្លួននៅព្រលានយន្តហោះកាលពីថ្ងៃទី ០៣ ខែឧសភា ឆ្នាំ ២០២៥ កន្លងទៅ ពេលដែលរូបគេទើបត្រឡប់មកពីសហរដ្ឋអាមេរិកវិញ៕
