ទារកទើបនឹងកើត ២ រូប បានបាត់បង់ជីវិត ក្រោយត្រូវសត្វកណ្តុរខាំនាមន្ទីរពេទ្យរដ្ឋមួយក្នុងក្រុង Indore ប្រទេសឥណ្ឌា។ ជុំវិញករណីនេះ គ្រូពេទ្យដែលទទួលបន្ទុកមើលថែទាំក្មេងទាំងពីរត្រូវបានផ្អាកការងារ ដើម្បីបើកការស៊ើបអង្កេតសិន។
រូបតំណាង
តាមព័ត៌មានបានឱ្យដឹងថា ទារករងគ្រោះត្រូវសត្វកណ្តុរខាំនៅយប់ថ្ងៃទី ៣០ និង ៣១ ខែសីហា ឆ្នាំ ២០២៥ កន្លងទៅ ដោយទារកម្នាក់រងរបួសត្រង់ដៃ និង ម្នាក់ទៀតរងរបួសនៅស្មា។
រូបតំណាង
ក្នុងចំណោមទារកទាំង ២ មានម្នាក់ទម្ងន់ត្រឹម ១.២ គីឡូក្រាមប៉ុណ្ណោះ បានស្លាប់នៅថ្ងៃទី ០២ ខែកញ្ញា ឆ្នាំ ២០២៥ ខណៈទារកទី ២ បានស្លាប់នៅថ្ងៃទី ០៣ ខែកញ្ញា ឆ្នាំ ២០២៥ ដោយគ្រូពេទ្យអះអាងថា ទារកនេះស្លាប់មិនមែនដោយសារសត្វកណ្តុរខាំឡើយ តែដោយសារការឆ្លងរោគធ្ងន់ធ្ងរ និង បញ្ហាសុខភាពពីកំណើត។
ទោះជាយ៉ាងណា វត្តមានសត្វកណ្ដុរក្នុងមន្ទីរពេទ្យបានធ្វើឱ្យមហាជនជាច្រើនផ្ទុះការមិនពេញចិត្ត ព្រោះបង្ហាញឱ្យឃើញពីការមិនយកចិត្តទុកដាក់ និង ការកង្វះអនាម័យក្នុងមន្ទីរពេទ្យ៕
