តាមរបាយការណ៍បញ្ចេញដោយនាយកដ្ឋានឧតុនិយម និង ជលសាស្ត្រប្រចាំប្រទេសមីយ៉ាន់ម៉ា កាលពីថ្ងៃទី ០៨ ខែមេសា ឆ្នាំ ២០២៥ កន្លងទៅបានឱ្យដឹងថា មីយ៉ាន់ម៉ា កើតមានគ្រោះរញ្ជួយដីរហូតដល់ ៩៨ ដងបន្ថែម ក្រោយរងការវាយប្រហារពីគ្រោះរញ្ជួយដីកម្រិត ៧.៧ រ៉ិចទ័រ កាលពីថ្ងៃទី ២៨ ខែមីនា ឆ្នាំ ២០២៥ កន្លងទៅ។
តាមនាយកដ្ឋានដដែលបានបញ្ជាក់ថា ការរញ្ជួយដីក្រោយៗទាំងនោះមានកម្រិតរញ្ជួយចន្លោះពី ២.៨ ទៅ ៧.៥ រ៉ិចទ័រ។ ងាកមកចំនួនអ្នកស្លាប់វិញ តាមរបាយការណ៍ចុងក្រោយដែលបញ្ចេញដោយក្រុមផ្ដល់ព័ត៌មាននៃក្រុមប្រឹក្សាផ្នែករដ្ឋបាលប្រចាំប្រទេសមីយ៉ាន់ម៉ានៅថ្ងៃទី ០៧ ខែមេសា ឆ្នាំ ២០២៥ បានឱ្យដឹងថា ចំនួនជនរងគ្រោះសរុបក្នុងហេតុការណ៍គ្រោះរញ្ជួយដីដ៏អាក្រក់នោះមានអ្នកស្លាប់ចំនួន ៣៦០០ នាក់ របួស ៥០១៧ នាក់ និង នៅបាត់ខ្លួនចំនួន ១៦០ នាក់។
ជាមួយនឹងប្រតិបត្តិការបន្តរុករកជនរងគ្រោះដែលមិនទាន់រកឃើញនេះដែរ ប្រទេសមីយ៉ាន់ម៉ាក៏ទទួលបានជំនួយពីសំណាក់បណ្ដាបណ្ដាប្រទេសនានាផងដែរ ដើម្បីជាការជួយសម្រួលក្នុងពេលវេលាដ៏លំបាកមួយនេះ៕
