កាលពីថ្ងៃទី ១៣ ខែឧសភា ឆ្នាំ ២០២៥ កន្លងទៅ តារា TikTok ម៉ិកស៊ិករូបស្រស់ដ៏ល្បីមួយរូបឈ្មោះ Valeria Marquez អាយុ ២៣ ឆ្នាំ ត្រូវបានគេបាញ់សម្លាប់យ៉ាងរន្ធត់ទាំងដែលរូបនាងកំពុងធ្វើការឡាយវីដេអូនៅហាងសាឡនរបស់ខ្លួន។
ករណីខាងលើនេះដែរ តាមការស៊ើបអង្កេតសង្ស័យថាជាការសម្លាប់ដោយសារតែភេទរបស់នាងជាស្ត្រី (femicide)។ ចំពោះទង្វើនេះបានបង្កជាការខឹងសម្បាយ៉ាងខ្លាំងពីមហាជនក្នុងប្រទេសជុំវិញករណីហិង្សាលើស្ត្រីបែបនេះ។
តាមព័ត៌មានបានឱ្យដឹងថា ដំបូងឡើយ នាង Valeria Marquez កំពុងតែឡាយវីដេអូពីក្នុងហាងសាឡនរបស់នាងនៅ Zapopan ខណៈកំពុងជជែកលេងជាមួយអ្នកគាំទ្រ ក៏ស្រាប់តែជនម្នាក់មកពីមុខទ្វារហាងរបស់នាងជាមួយប្រអប់តូចមួយ។ នាងបាននិយាយថា ៖ «ជាកូនជ្រូក» ខណៈងាកទៅមើលអ្នកគាំទ្ររបស់នាងវិញ រួមទាំងបើកប្រអប់កាដូនោះដែលនាងឃើញថាជាតុក្កតាមួយ។
ភ្លាមៗនោះ នាង Valeria Marquez បានញញឹម និង យកដៃវែកសក់របស់នាងទៅលើស្មា។ យ៉ាងណាមិញ មួយសន្ទុះក្រោយមកក៏ឃើញនាងដួលលើកៅអី ហើយមានឈាមហូរដាបលើតុនៅខាងមុខ ទាំងដែលវីដេអូកំពុងឡាយ។ វីដេអូនាងបានបិទក្រោយមានមនុស្សម្នាក់យកទូរស័ព្ទនាងទៅ។
តាមការបញ្ជាក់ពីខាងការិយាល័យមេធាវីរដ្ឋ Jalisco នាង Marquez ត្រូវបានបុរសម្នាក់បាញ់សម្លាប់។ ការស្លាប់របស់ Marquez នេះដែរបានបង្កការខឹងសម្បា និង ប្រតិកម្មជាខ្លាំងពីសំណាក់ប្រជាជនក្នុងប្រទេស ទាំងដែលប្រទេសនេះមានករណីសម្លាប់ និង ហិង្សាលើស្ត្រីបែបនេះយូរណាស់មកហើយ៕
ប្រភព៖ Kenh14
