កាលពីថ្ងៃទី ១៤ ខែតុលា ឆ្នាំ ២០២៥ កន្លងទៅ មានករណីដ៏រន្ធត់មួយបានកើតឡើងក្នុងប្រទេសអ៊ីតាលី ដោយតារាម៉ូដែល និង ជាតារាទូរទស្សន៍ដ៏ល្បី Pamela Genini អាយុ ២៩ ឆ្នាំ ត្រូវមិត្តប្រុសចាក់សម្លាប់ជាង ២០ កាំបិត ក្នុងអាផាតមិនរបស់នាង។
ជនសង្ស័យត្រូវបានស្គាល់ឈ្មោះថា Gianluca Soncin អាយុ ៥២ ឆ្នាំ ជាអ្នកជំនួញម្នាក់។ រូបលោក និង នាង Genini គឺបានមានទំនាក់ទំនងស្នេហាគ្នារយៈពេលប្រមាណជា ១ ឆ្នាំ។ តាមរបាយការណ៍ពីសារព័ត៌មានក្នុងតំបន់បានឱ្យដឹងថា ករណីឃាតកម្មដ៏សាហាវបានកើតឡើង ក្រោយជនរងគ្រោះ និង ជនសង្ស័យកើតមានជម្លោះជាមួយគ្នាខ្លាំង។
ជនរងគ្រោះ គឺមានបំណងចង់បញ្ចប់ចំណងស្នេហ៍មួយនេះ ព្រោះតែស៊ូទ្រាំនឹងទង្វើហួងហែងជ្រុល និង ចូលចិត្តប្រើហិង្សារបស់ជនសង្ស័យ។ អំឡុងពេលកើតហេតុនោះ អ្នកជិតខាងបានឮនាង Genini ស្រែកឱ្យជួយ ទើបពួកគេទាក់ទងទៅកាន់ប៉ូលិសភ្លាមៗ។ យ៉ាងណាមិញ ពេលប៉ូលិសមកដល់ទីតាំង អ្វីៗគឺហួសពេលទៅហើយ Genini បានដេកស្លាប់ក្នុងថ្លុកឈាមនៅយ៉មុខផ្ទះ ជាមួយរបួសស្នាមកាំបិតចំនួន ២៤ កន្លែង។
ដោយឡែក ចំពោះជនសង្ស័យវិញ ក្រោយបញ្ចប់ជីវិតមិត្តស្រីខ្លួន រូបគេក៏បានព្យាយាមធ្វើអត្តឃាតខ្លួនឯង ប៉ុន្តែត្រូវប្រទះឃើញទាន់ពេល បញ្ជូនទៅសង្គ្រោះនៅមន្ទីរពេទ្យ។ បច្ចុប្បន្ន ជនសង្ស័យកំពុងស្ថិតក្រោមការឃ្លាំមើលរបស់ប៉ូលិសក្នុងមន្ទីរពេទ្យ និង ត្រូវបានជាប់ចោទពីបទប្រើប្រាស់ហិង្សា និង សម្លាប់មនុស្ស៕
