ប្រទេសកូរ៉េខាងត្បូងកំពុងជួបភាពសោកសៅ និង កាន់ទុក្ខជាខ្លាំង ក្រោយយន្តហោះមួយគ្រឿងរបស់ Jeju Air បានជួបហេតុការណ៍បុកផ្ទុះឆេះសម្លាប់មនុស្សអស់ ១៧៩ នាក់កាលពីព្រឹកថ្ងៃទី ២៩ ខែធ្នូ ឆ្នាំ ២០២៤ កន្លងទៅ។
គិតរហូតមកទល់ពេលនេះ ក្រៅពីអូតែសចំនួន ២ រូបត្រូវបានជួយសង្គ្រោះ សាកសពជនរងគ្រោះទាំង ១៧៩ នាក់ផ្សេងទៀតក៏ត្រូវបានរកឃើញអស់ហើយដែរ។ សាកសពជនរងគ្រោះមួយចំនួនត្រូវបានកំណត់អត្តសញ្ញាណ និង បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ខណៈមួយចំនួនផ្សេងទៀតនៅមិនទាន់កំណត់បាននៅឡើយ។
អ្វីដែលកាន់តែរន្ធត់ក្ដុកក្ដួលខ្លាំងបំផុតនោះ គឺក្នុងចំណោមជនរងគ្រោះដែលកំណត់អត្តសញ្ញាណបាន មានមនុស្ស ៩ នាក់ក្នុងគ្រួសារតែមួយបានបាត់បង់ជីវិតទាំងអស់ក្នុងសោកនាដកម្មបុកឆេះយន្តហោះ Jeju Air។ តាមព័ត៌មានបានឱ្យដឹងថា ក្នុងចំណោមក្រុមគ្រួសារទាំង ៩ នាក់ ជនរងគ្រោះចំណាស់ជាងគេក្នុងគ្រួសារជាបុរសម្នាក់អាយុ ៨០ ឆ្នាំ និង សមាជិក ៨ នាក់ផ្សេងទៀតរួមមានភរិយារបស់លោក កូនស្រី និង ចៅៗ (ចៅក្មេងជាងគេបំផុតអាយុត្រឹម ៥ ឆ្នាំប៉ុណ្ណោះ)។ ក្រុមគ្រួសាររបស់ពួកគេនេះដែរ គឺទើបតែត្រឡប់មកពីដំណើរកម្សាន្តទៅកាន់ប្រទេសថៃ មិននឹកស្មានថាភាពសប្បាយរីករាយប្រែក្លាយជារឿងដ៏សោកសៅបំផុតបែបនេះសោះ៕
ប្រភព៖ Kenh14
