ប្រធានាធិបតីអាមេរិក លោក ដូណាល់ ត្រាំ គ្រោងលក់រថយន្តម៉ាក Tesla ដែលលោកទិញកាលពីខែមីនា ឆ្នាំ ២០២៥ កន្លងទៅចេញ ក្រោយកើតមានជម្លោះពាក្យសម្ដីតាមអនឡាញជាមួយលោក Elon Musk។
តាមប្រភពពីខាងសេតវិមានថ្លែងប្រាប់សារព័ត៌មាន CNN បានឱ្យដឹងថា លោកប្រធានាធិបតី ដូណាល់ ត្រាំ គឺកំពុងពិចារណាលក់ឡាន Tesla ដែលលោកទិញក្នុងបំណងជួយផ្សព្វផ្សាយឱ្យក្រុមហ៊ុនរបស់លោក Elon Musk នោះចេញវិញ ដោយតាមការលើកឡើងពីមន្ត្រីជាន់ខ្ពស់នៅសេតវិមាន ឡាននោះអាចនឹងត្រូវលក់ ឬឱ្យទៅអ្នកផ្សេង។
គួរឱ្យដឹងថា ថ្មីៗកន្លងទៅនេះ ទំនាក់ទំនងជិតស្និទ្ធរវាងលោក ដូណាល់ ត្រាំ និង ស្ថាបនិកក្រុមហ៊ុន Tesla លោក Elon Musk គឺបានប្រែក្លាយជាគូជំទាស់ជាមួយគ្នា ក្រោយអ្នកទាំងពីរមានការទាស់សម្ដីគ្នាខ្លាំងលើបណ្ដាញសង្គម។ ថ្លែងប្រាប់សារព័ត៌មាន CNN លោក ត្រាំ បាននិយាយថា៖ «ខ្ញុំមិនដែលគិតពី Elon ឡើយ។ គេមានបញ្ហាហើយ អាណិតណាស់ គេមានបញ្ហាហើយ»។ មុននេះទៀត លោកក៏បាននិយាយប្រាប់សារព័ត៌មាន ABC News ដោយហៅលោក Elon Musk ថា៖ «មនុស្សឆ្កួត» ទៀតផង។
គួររំឭក កាលពីថ្ងៃទី ០៥ ខែមិថុនា ឆ្នាំ ២០២៥ កន្លងទៅ មហាសេដ្ឋី Elon Musk បានធ្វើការបង្ហោះលើបណ្ដាញសង្គម X ថា៖ «បើគ្មានខ្ញុំ ត្រាំចាញ់ឆ្នោតបាត់ទៅហើយ។ គណបក្សប្រជាធិបតេយ្យនឹងគ្រប់គ្រងសភាតំណាងរាស្ត្រ ហើយគណបក្សសាធារណរដ្ឋនឹងមានសំឡេងភាគច្រើន ៥១-៤៩ នៅក្នុងព្រឹទ្ធសភា។ ពិតជាមិនដឹងគុណមែន»។
ស្របពេល ទំនាក់ទំនងរវាងលោក ដូណាល់ ត្រាំ និង លោក Elon Musk ប្រឈមនឹងការបែកបាក់គ្នា ខាងសេតវិមានក៏បានចេញមកបញ្ជាក់ថា ភាគីទាំងសងខាងនឹងធ្វើការនិយាយគ្នាតាមទូរស័ព្ទនៅថ្ងៃទី ០៦ ខែមិថុនា ឆ្នាំ ២០២៥ ដែលការនិយាយគ្នានេះអាចជួយបន្ថយភាពតានតឹងរវាងគ្នា ក្រោយការតតាំងគ្នាលើបណ្ដាញសង្គមនោះ។
យ៉ាងណាមិញ បើតាមប្រភពថ្មីមួយពីសេតវិមានបានលើកឡើងថា លោកប្រធានាធិបតី ដូណាល់ ត្រាំ គឺមិនបានខ្វល់ខ្វាយពីលោក Elon Musk ឡើយ ហើយក៏នឹងមិននិយាយគ្នាជាមួយមហាសេដ្ឋីរូបនេះនៅពេលខាងមុខទៀតនោះដែរ៕
