កាលពីថ្ងៃទី ១៩ ខែមិថុនា ឆ្នាំ ២០២៥ កន្លងទៅ ហេតុការណ៍ដ៏គួរឱ្យក្តុកក្តួល និង តក់ស្លុតមួយ បានកើតមានឡើងនៅក្រុង Melaka ប្រទេសម៉ាឡេស៊ី ដោយបុរសវ័យ ៣៥ ឆ្នាំម្នាក់ កើតអាការគាំងបេះដូងស្លាប់ភ្លាមៗ ដោយដួលសង្កត់ទៅលើកូនតូចអាយុ ៣ ខែរបស់ខ្លួនបណ្ដាលឱ្យស្លាប់ទៅទាំងព្រមគួរឱ្យអាណោចអាធ័មបំផុត។
ជនរងគ្រោះតូចអាយុ ៣ ខែ ត្រូវបានស្គាល់ឈ្មោះថា Muhammad Nur Daniel Nurul Effendy និង បុរសជាឪពុកមានឈ្មោះ Nurul Effendy Ibrahim។ នៅពេលស្ត្រីជាម្ដាយឃើញហេតុការណ៍នោះ ទាំងឪពុក និង កូន បានស្លាប់លើគ្រែទាំង ២ បាត់ទៅហើយ។
តាមសម្ដីរបស់ប្រពន្ធជនរងគ្រោះបានឱ្យដឹងថា នៅយប់កើតហេតុ ជនរងគ្រោះបានប្រាប់ប្រពន្ធថាចុកទ្រូងតែមិនខ្វល់ទៅរកពេទ្យពិនិត្យឡើយ។ មកដល់ព្រឹកព្រលឹម លោកក៏ស្រាប់តែគាំងបេះដូងភ្លាមៗដួលលើកូនប្រុសតូចរបស់ខ្លួនដែលកំពុងដេកក្បែរខ្លួនបណ្ដាលឱ្យស្លាប់ទាំងពីរនាក់។
អ្វីដែលរឹតតែខ្លោចចិត្តជាងនេះទៅទៀតនោះគឺថា ប្ដីប្រពន្ធមួយគូនេះត្រូវរង់ចាំដល់ ១៥ ឆ្នាំទម្រាំបានកូនដូចបំណង តែក្ដីសុខរបស់ពួកគេកើតឡើងបានត្រឹមមួយភ្លែតក៏ត្រូវរលាយទៅវិញបន្សល់តែការឈឺចាប់ដក់ជាប់ពេញមួយជីវិត៕
ប្រភព៖ Kenh14
