ថ្មីៗនេះ សារព័ត៌មាន India Today បានចេញផ្សាយករណីដ៏តក់ស្លុត និង រំជួលចិត្តខ្លាំងមួយដោយស្ត្រីវ័យ ៣២ ឆ្នាំម្នាក់នៅសង្កាត់ Amroha រដ្ឋ Uttar Pradesh ប្រទេសឥណ្ឌា បានសម្រេចចិត្តសម្លាប់ខ្លួនឯងដោយសារតែខូចចិត្តខ្លាំងទទួលលែងបាន ក្រោយសត្វឆ្មាចិញ្ចឹមជាទីស្រឡាញ់របស់នាងបានងាប់ទៅ។
តាមព័ត៌មានបានឱ្យដឹងថា ស្ត្រីខាងលើបានទុកសាកសពឆ្មាចិញ្ចឹមនៅក្បែរខ្លួននាងរយៈពេល ២ ថ្ងៃ ដោយសង្ឃឹមថាវាអាចរស់រានឡើងវិញ ប៉ុន្តែនៅថ្ងៃទី ៣ នាងក៏បានធ្វើការសម្រេចចិត្តចុងក្រោយដោយស្លាប់ទៅតាមឆ្មា ក្រោយក្ដីសង្ឃឹមថាសត្វចិញ្ចឹមរស់ឡើងវិញមិនអាចទៅរួច។ គួរឱ្យដឹងផងដែរថា ស្ត្រីរងគ្រោះមានឈ្មោះ Pooja បានរៀបការជាមួយបុរសម្នាក់មកពីក្រុង Delhi កាលពីប្រមាណ ៨ ឆ្នាំមុន ប៉ុន្តែ ២ ឆ្នាំក្រោយមក ពួកគេក៏បានលែងលះគ្នា ហើយ Pooja ក៏បានវិលត្រឡប់ទៅរស់នៅជាមួយម្ដាយវិញ។
តាមសាច់ញាតិ ដើម្បីបន្លប់ភាពឯកោ Pooja ក៏បានយកឆ្មាមួយក្បាលមកចិញ្ចឹម តែជាអកុសលសត្វចិញ្ចឹមមួយក្បាលនោះក៏បានងាប់ទៅកាលពីថ្ងៃទី ២៧ ខែកុម្ភៈ ឆ្នាំ ២០២៥ កន្លងទៅ។ ម្ដាយរបស់នាងបានប្រាប់ឱ្យនាងយកឆ្មានោះទៅកប់ដែរ តែនាងបដិសេធដោយនិយាយថាវានឹងរស់ឡើងវិញ។ Pooja ឱបខ្មោចឆ្មាជាប់មិនលែងឡើយរយៈពេល ២ ថ្ងៃ ហើយទោះសាច់ញាតិ និង ម្ដាយប្រាប់ឱ្យនាងយកវាទៅកប់ ក៏នាងនៅតែបដិសេធដដែល។
មកដល់ថ្ងៃទី ៣ ពោលគឺនៅថ្ងៃទី ០១ ខែមីនា ឆ្នាំ ២០២៥ ដោយក្ដីសង្ឃឹមថាឆ្មារស់ឡើងវិញគឺមិនអាចទៅរួច Pooja ក៏សម្រេចចិត្តចង-កបញ្ចប់ជីវិតខ្លួនឯងក្នុងបន្ទប់។ បច្ចុប្បន្ន សាកសពរបស់នាងត្រូវបានប៉ូលិសយកទៅធ្វើកោសល្យវិច័យ និង របាយការណ៍ចុងក្រោយយ៉ាងណានោះរង់ចាំរបាយការណ៍ពីខាងកោសល្យវិច័យសិន៕
ប្រភព៖ Kenh14
