នារីទេសចរសញ្ជាតិប្រេស៊ីលម្នាក់ ជាប់គាំងក្នុងភ្នំភ្លើងរយៈពេល ៤ ថ្ងៃ ក្រោយពេលរូបនាងឡើងលេងជ្រលងភ្នំក្បែរភ្នំភ្លើងសកម្មនោះនៅប្រទេសឥណ្ឌូនេស៊ី។ ក្រុមសង្គ្រោះបានស្វះស្វែងព្យាយាមជួយផងដែរ ប៉ុន្តែដោយសារការរាំងស្ទះពីអាកាសធាតុមិនល្អទើបអ្វីៗត្រូវហួសពេលដោយនារីរូបនោះទម្រាំរកឃើញចុះជួយបានគឺរូបនាងបានបាត់បង់ជីវិតទៅហើយ។
ជនរងគ្រោះមានឈ្មោះថា Juliana Marins អាយុ ២៦ ឆ្នាំ បានឡើងភ្នំលេងជាមួយក្រុមមិត្តភក្តិរបស់នាងនៅភ្នំ Rinjani ប្រទេសឥណ្ឌូនេស៊ី។ យ៉ាងណាមិញ ខណៈកំពុងដើរឡើងភ្នំនោះ នាងស្រាប់តែរអិលធ្លាក់ចុះទៅក្រោមក្នុងកម្ពស់ជាង ១៤៩ ម៉ែត្រ កាលពីព្រឹកថ្ងៃទី ២១ ខែមិថុនា ឆ្នាំ ២០២៥ កន្លងទៅ។ មកដល់ថ្ងៃទី ២៣ ខែមិថុនា ឆ្នាំ ២០២៥ ជនរងគ្រោះក៏រអិលធ្លាក់ចុះទៅក្រោមថែមជាង ៤៨៧ ម៉ែត្រទៀត។
សម្រែកស្រែកឱ្យជួយពីជនរងគ្រោះត្រូវបានឮពេលធ្លាក់ដំបូងៗ ដោយតាមរូបភាពដែលចាប់បានដោយដ្រូនក៏បង្ហាញឱ្យឃើញរូបនាងនៅមានជីវិតផងដែរក្រោយធ្លាក់ចុះភ្លាម។ ទោះជាយ៉ាងណា ក្រុមសង្គ្រោះមិនអាចចុះទៅដល់ទីតាំងដែលនាងធ្លាក់នោះឡើយដោយសារតែអ័ព្ទខ្លាំងហ៊ុំព័ទ្ធភ្នំភ្លើងបូករួមនឹងស្ថានភាពលំបាកផ្សេងៗទៀត។
រហូតដល់ ៤ ថ្ងៃក្រោយ អាកាសធាតុបានប្រសើរឡើងវិញ ក្រុមសង្គ្រោះក៏រកឃើញជនរងគ្រោះ តែអកុសលគឺរកឃើញនាងក្នុងសភាពជាសាកសពទៅហើយ។ គួរបញ្ជាក់ថា បច្ចុប្បន្ននៅមិនទាន់មានការបញ្ជាក់ច្បាស់ណាមួយឡើយថា Marins បាត់បង់ជីវិតទៅនៅពេលណា ឬខាងក្រុមសង្គ្រោះអាចចុះទៅយកសាកសពរបស់នាងបានឬយ៉ាងណានោះឡើយ៕
ប្រភព៖ NyPost
