កាលពីពេលថ្មីៗកន្លងទៅ ភាគពាយ័ព្យប្រទេសប៉ាគីស្ថានបានជួបប្រទះគ្រោះទឹកជំនន់ដ៏អាក្រក់ ហូរបំបុកបំផ្លាញភូមិស្រុកប្រជាពលរដ្ឋរហូតបណ្ដាលឱ្យមនុស្សចំនួន ៣០៧ នាក់ត្រូវបាត់បង់អាយុជីវិតត្រឹមតែមួយថ្ងៃ។
តាមការចេញផ្សាយរបស់សារព័ត៌មាន Hindustan Times បានឱ្យដឹងថា ទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំងនេះដែរ បានហូរខ្មួលខ្មាញ់កាត់ភាគពាយ័ព្យប្រទេសប៉ាគីស្ថាន វាយប្រហារគ្របដណ្ដប់ពាសពេញក្រុង និង ភូមិ នៅទីនោះ រហូតឆក់យកអាយុជីវិតមនុស្សជាង ៣០០ នាក់ត្រឹមពេល ២៤ ម៉ោង ដោយក្នុងនោះរួមមានសមាជិកក្រុមសង្គ្រោះតាមឧទ្ធម្ភាគចក្រចំនួន ៥ នាក់ផងដែរ។ ភូមិដែលរងគ្រោះខ្លាំងក្លាជាងគេរួមមានភូមិ Pir Baba និង Malik Pura ដែលក្រុមសង្គ្រោះបានរកឃើញសពជនរងគ្រោះច្រើនខ្លាំងជាងគេបំផុត។
គួរឱ្យដឹងថា ចាប់តាំងពីចុងខែមិថុនា ឆ្នាំ ២០២៥ ដែលចាប់ផ្ដើមចូលរដូវខ្យល់មូសុង ភ្លៀងក៏ចាប់ផ្ដើមធ្លាក់ខ្លាំងបង្កជាការបំផ្លិចបំផ្លាញពាសពេញប្រទេស ជាពិសេសនៅតំបន់ Khyber Pakhtunkhwa និង តំបន់ភាគខាងជើង ដោយបណ្ដាលមកពីគ្រោះទឹកជំនន់ ការរអិលបាក់ដី និង ការផ្លាស់ទីលំនៅរបស់ពលរដ្ឋស្ថិតនៅតំបន់ងាយរងគ្រោះ ឬតំបន់ដែលមានមនុស្សរស់នៅច្រើនកកកុញ៕
ប្រភព៖ Hindustan Times
