តាមការបញ្ជាក់ពីខាងភ្នាក់ងារឆ្មាំសមុទ្ររបស់សហរដ្ឋអាមេរិកបានឱ្យដឹងថា នៅថ្ងៃទី ០៧ ខែកុម្ភៈ ឆ្នាំ ២០២៥ ពួកគេបានរកឃើញបំណែកយន្តហោះដែលដូចគ្នាទៅនឹងយន្តហោះរបស់ Bering Air ដែលបានបាត់ខ្លួននោះហើយ ដោយយន្តហោះបានធ្លាក់លើវាលទឹកកកក្នុងចម្ងាយប្រមាណ ៥៥ គីឡូម៉ែត្រភាគអាគ្នេយ៍ពីទីក្រុង Nome។ កងកម្លាំងសង្គ្រោះបានសន្មតថា ជនរងគ្រោះទាំង ១០ នាក់លើយន្តហោះបានបាត់បង់ជីវិតទាំងអស់។
លោក Mike Salerno អ្នកនាំពាក្យឆ្មាំសមុទ្រអាមេរិកបាននិយាយថា បំណែកយន្តហោះត្រូវបានរកឃើញខណៈពួកគេប្រើប្រាស់ឧទ្ធម្ភាគចក្ររុករកតាមតំបន់ចុងក្រោយដែលយន្តហោះបានផ្ដល់ឱ្យ។ ក្រោយមក ខាងភ្នាក់ងារបានទម្លាក់ក្រុមការងារចំនួន ២ នាក់ចុះទៅទីតាំងដើម្បីស្វែងរក។
តាមមន្ត្រីឆ្មាំសមុទ្រមួយរូបទៀត លោក Benjamin McIntyre-Coble បានឱ្យដឹងដែរថា យន្តហោះនោះមិនបានផ្ដល់សញ្ញាគួរឱ្យព្រួយបារម្ភអ្វីឡើយមុនពេលជួបហេតុការណ៍ធ្លាក់នោះ។ លោក McIntyre-Coble បានឱ្យដឹងទៀតថា យន្តហោះនោះមានឧបករណ៍ផ្ដល់ទីតាំងពេលអាសន្នដែលអាចបញ្ជូនសញ្ញាអាសន្នដល់ខាងឆ្មាំសមុទ្របាន ប្រសិនបើធ្លាក់ចូលទឹកហើយមិនមែនលើវាលទឹកកកនោះ។ ដោយសារតែធ្លាក់លើទឹកកកនេះហើយ ទើបឧបករណ៍នោះមិនដំណើរការបាន។
គួរបញ្ជាក់ថា យន្តហោះរបស់ Bering Air ខាងលើ បានដឹកអ្នកដំណើរទាំងអស់ ៩ នាក់ និង ពីឡុតម្នាក់ បានបាត់ការទាក់ទងពីរ៉ាដាខណៈហោះចេញពីក្រុង Unalakleet ឆ្ពោះទៅកាន់ទីក្រុង Nome រដ្ឋ Alaska សហរដ្ឋអាមេរិក។ នេះចាត់ទុកជាករណីគ្រោះថ្នាក់យន្តហោះធំៗទី ៣ ហើយនៅអាមេរិក ក្នុងរយៈពេលត្រឹមតែ ៨ ថ្ងៃ ដោយកាលពីថ្ងៃទី ២៩ ខែមករា មានករណីយន្តហោះដឹកអ្នកដំណើរបុកគ្នាជាមួយឧទ្ធម្ភាគចក្រយោធានៅ Washington បណ្ដាលឱ្យមនុស្ស ៦៧ នាក់បានស្លាប់។ ចំណែកមួយករណីទៀត កើតមានឡើងនៅថ្ងៃទី ៣១ ខែមករា យន្តហោះធុនតូចដឹកអ្នកជំងឺ បានធ្លាក់បុកផ្ទះសម្បែងពលរដ្ឋនៅ Philadelphia ឆក់យកអាយុជីវិតមនុស្សលើយន្តហោះ ៦ នាក់ និង ម្នាក់ទៀតជាអ្នកដំណើរលើដងផ្លូវ៕
ប្រភព៖ VN EXPRESS
