កាលពីយប់ថ្ងៃទី ១០ ខែមីនា ឆ្នាំ ២០២៥ កន្លងទៅ សារព័ត៌មាន និង សាធារណជនជាច្រើនមានការភ្ញាក់ផ្អើលជាខ្លាំងក្រោយមាន channel youtube មួយទម្លាយថា តារាសម្ដែង Kim Soo Hyun និង Kim Sae Ron បានទាក់ទងស្នេហាគ្នារយៈពេល ៦ ឆ្នាំតាំងពីតារាស្រីរូបនោះមានអាយុត្រឹម ១៥ ឆ្នាំប៉ុណ្ណោះ។ អ្នកដែលចេញមកអះអាងពីរឿងនេះដែរគឺថាខ្លួនជាម្ដាយមីងរបស់ Kim Sae Ron ដោយរូបគាត់បានទម្លាយរឿងទាំងអស់នេះនៅលើ channel youtube មួយឈ្មោះ Garo Sero Institute។ យ៉ាងណាមិញ ក្រោយការទម្លាយពីទំនាក់ទំនង ឬការប៉ះពាល់រាងកាយក្មេងស្រីទាំងមិនទាន់គ្រប់អាយុនេះ ខាងតារាប្រុស Kim Soo Hyun ក៏បានចេញមុខមកបដិសេធ រួមទាំងមានចំណាត់ការទៅតាមផ្លូវច្បាប់ផងដែរ។
ខណៈប្រធានបទមួយនេះកំពុងតែផ្ទុះក្ដៅគគុក ខាងសារព័ត៌មានចិនមួយចំនួនដូចជា 163, Sohu និង Sina ជាដើម បានគាស់កកាយពាក្យពេចន៍មួយចំនួនដែលតារាសម្ដែង Kim Soo Hyun ធ្លាប់បានលើកមកនិយាយពាក់ព័ន្ធនឹងរឿងរ៉ាវជីវិតស្នេហារបស់លោក។ ពាក្យសម្ដីទាំងនោះគឺ Kim Soo Hyun និយាយអំឡុងពេលធ្វើការ promote រឿង «Secretly, Greatly» ក្នុងឆ្នាំ ២០១៣ នៅពេលដែលមានអ្នកគាំទ្រសួរលោកជុំវិញគម្រោងរៀបការ។
ពេលនោះដែរ Kim Soo Hyun ដែលមានអាយុត្រឹម ២៥ ឆ្នាំបានឆ្លើយតបវិញថា៖ «ការរៀបការអាចនឹងត្រូវពន្យារពេលបន្តិចហើយ។ ខ្ញុំធ្លាប់គិតថាខ្ញុំនឹងរៀបការនៅអាយុ ៣៦ ឆ្នាំ ប៉ុន្តែឥលូវខ្ញុំគិតថាគម្រោងនេះគឺអាចនឹងពិបាកនឹងកើតឡើង។ ប្រហែលខ្ញុំនឹងរៀបការនៅអាយុ ៤១ ឆ្នាំ នៅពេលនោះ ខ្ញុំនឹងជួបមនុស្សស្រីអាយុ ២១ ឆ្នាំ»។ ចម្លើយទាំងនេះបានធ្វើឱ្យ MC Kim Tae Jin និយាយលេងសើចតបថា៖ «អ៊ីចឹងមានន័យថាអនាគតប្រពន្ធលោកឥលូវនៅជាក្មេងមតេយ្យនៅឡើយទេ»។ មិនត្រឹមប៉ុណ្ណឹងទេ Kim Soo Hyun ក៏បានចែករំលែកបន្ថែមជុំវិញអនាគតប្រពន្ធលោកថែមទៀតថា៖ «នាងត្រូវតែហ៊ានស្លាប់ដើម្បីខ្ញុំ គិតតែពីខ្ញុំ មិនបញ្ឈប់ខ្ញុំមិនឱ្យធ្វើការងារ តែពេលខ្ញុំត្រូវការនាង នាងត្រូវតែនៅក្បែរខ្លួនខ្ញុំជានិច្ច»។
គួរឱ្យដឹងថា បច្ចុប្បន្នព័ត៌មានជុំវិញទំនាក់ទំនងស្នេហារវាង Kim Soo Hyun និង Kim Sae Ron កំពុងក្លាយជាប្រធានបទក្ដៅគគុកទាំងលើបណ្ដាសារព័ត៌មាន និង បណ្ដាញសង្គមនានា រហូតមហាជនជាច្រើននាំគ្នាផ្ទុះការវែកញែកព្រោងព្រាត។ យ៉ាងណាមិញ រឿងរ៉ាវពិតប្រាកដយ៉ាងណានោះ មានតែចាំការ update ព័ត៌មានបន្តទៀត៕
ប្រភព៖ Kenh14
