លោក Wong Hei ដែលជាអតីតតារាសម្ដែងប្រចាំទូរទស្សន៍ TVB ប៉ុន្មានឆ្នាំចុងក្រោយនេះសង្កេតឃើញថាលោកហាក់ស្ងប់ស្ងាត់មិនសូវបង្ហាញខ្លួននោះឡើយ។ យ៉ាងណាមិញ ស្រាប់តែនៅថ្ងៃទី ១២ ខែឧសភា ឆ្នាំ ២០២៥ កន្លងទៅ តារាប្រុសវ័យ ៥៧ ឆ្នាំរូបនេះ បានធ្វើឱ្យអ្នកគាំទ្រភ្ញាក់ផ្អើលជាខ្លាំង នៅពេលដែលរូបលោកបានចេញមកទម្លាយលើ channel youtube ផ្ទាល់ខ្លួន រៀបរាប់ពីរឿងរ៉ាវដ៏មិននឹកស្មានមួយដែលបានកើតឡើងចំពោះលោកកាលពីឆ្នាំមុន។
ចំណងជើងវីដេអូដែលលោកបង្ហោះលើ youtube នោះដែរបានសរសេរថា៖ «លើកដំបូង ខ្ញុំត្រូវគេដាក់ថ្នាំ និង រំលោភ» ដោយលោកអះអាងថា លោកត្រូវគេបៀតបៀនរាងកាយដល់ទៅ ២ ដងកាលពីឆ្នាំ ២០២៤ អំឡុងពេលរស់នៅតៃវ៉ាន់។
តាមការរៀបរាប់របស់លោក Wong Hei ហេតុការណ៍ដំបូងកើតឡើងនៅព្រឹកថ្ងៃទី ១៥ ខែកក្កដា ឆ្នាំ ២០២៤ នៅតំបន់ Hsinchu។ លោកថា លោកត្រូវបានគេដាក់ថ្នាំនៅកន្លែងរបស់មិត្តភក្តិ ហើយក្រោយមកក៏ដឹងខ្លួនទាំងខ្លួនឯងដេកផ្កាប់មុខ ពិបាកដកដង្ហើម មុនពេលសន្លប់ទៅវិញ។ ពេលលោកដឹងខ្លួនឡើងវិញ លោកឃើញថាខ្លួនឯងនៅលើឥដ្ឋ ឈឺចុកចាប់ពាសពេញខ្លួន និង មានស្នាមជាំពេញទាំងខ្លួនផងដែរ។
លោក Wong Hei បានអះអាងទៀតថា មិត្តភក្តិរបស់លោកគឺមើលទៅដូចព្រងើយៗ និង និយាយទូរស័ព្ទធម្មតា។ យ៉ាងណាមិញ ក្រោយមកពួកគេទទូចនាំលោកទៅជិះរថភ្លើងពេលព្រឹក ដឹកលោកទៅកន្លែងដាច់ស្រយាលពីស្ថានីយ។ នៅលើរថភ្លើង Wong Hei ចាប់អារម្មណ៍ថា អ្នកដំណើរមួយចំនួនមើលទៅចម្លែកៗដូចកំពុងការពារអ្វីមួយអ៊ីចឹង។
ចំពោះហេតុការណ៍លើកទី ២ លោក Wong Hei ថាបានកើតឡើងនៅថ្ងៃទី ១០ ខែធ្នូ ឆ្នាំ ២០២៤ ក្រោយពេលរូបលោកផឹកស៊ីជាមួយមិត្តភក្តិ ២ នាក់។ ស្រដៀងលើកទីមួយដែរ លោកបានសន្លប់ហើយពេលភ្ញាក់ឡើងវិញ កម្រើកខ្លួនមិនរួចមុនសន្លប់ទៅវិញ។
លោកនិយាយទៀតថា ក្រោយមកពេលដឹងខ្លួនវិញ ខ្លួនលោកពោរពេញដោយឈាម ជង្គង់របស់លោកឡើងជាំ ហើយក៏ឃើញមានវត្ថុរាវសលាយជាមួយលាមកនៅចន្លោះគូទរបស់លោក។ បើទោះរឿងហេតុកើតឡើងមិនសមទំនងក៏ពិតមែន ប៉ុន្តែមិត្តភក្តិរបស់លោកទាំង ២ នាក់នោះគឺធ្វើធម្មតាដូចគ្មានរឿងអ្វីកើតឡើងអ៊ីចឹង។
ជុំវិញការបៀតបៀននេះដែរ លោក Wong Hei ក៏បានទៅឱ្យគ្រូពេទ្យជួយពិនិត្យមើល ប៉ុន្តែលោកបញ្ជាក់ទៀតថាលោកបានទៅប៉ះនឹងបុគ្គលិកពេទ្យដែលមិនសហការគ្នា។
ជិតបញ្ចប់នៃវីដេអូ លោក Wong Hei បាននិយាយថា លោកបានកើតអាការមួយហៅថា Rhabdomyolysis ដែលលោកជឿជាក់ថាមានពាក់ព័ន្ធនឹងការបៀតបៀនទាំង ២ លើកនោះ។ ទោះជួបហេតុការណ៍ប៉ះពាល់ដល់រាងកាយបែបនេះក៏ពិតមែន ប៉ុន្តែលោក Wong Hei មិនបានរាយការណ៍ប្រាប់ប៉ូលិសឡើយ ដោយសារតែលោកមិនមានការទុកចិត្តលើខាងអាជ្ញាធរ៕
