នៅថ្ងៃទី ១៣ ខែតុលា ឆ្នាំ ២០២៥ នេះ DJ ស្រីដ៏ល្បីមួយរូបនៅប្រទេសវៀតណាម DJ Ngan 98 ត្រូវបានប៉ូលិសក្រុងហូជីមិញចាប់ឃាត់ខ្លួន ពាក់ព័ន្ធនឹងករណីលក់ផលិតផលថ្នាំសម្រកទម្ងន់ក្លែងក្លាយ មានផ្ទុកសារធាតុហាមឃាត់ដែលបង្កផលប៉ះពាល់ធ្ងន់ធ្ងរដល់សុខភាពអ្នកប្រើប្រាស់។
ផលិតផលទាំងនោះដែរ បានផលិតនៅរោងចក្រមួយនៅ Dan Phuong Industrial Park នាក្រុងហាណូយ ខណៈក្រុមហ៊ុន ZuBu and Service Company Limited (គ្រប់គ្រងដោយម្ដាយរបស់ DJ Ngan 98) មានទីតាំងនៅក្រុងហូជីមិញ រួមជាមួយក្រុមហ៊ុនដៃគូមួយទៀតឈ្មោះ ZuBu Shop Business Household ទទួលខុសត្រូវលើគុណភាព និង ការចែកចាយលក់។
ខណៈធ្វើការជាមួយនឹងក្រុមភ្នាក់ងារស៊ើបអង្កេត DJ Ngan 98 ត្រូវខាងអាជ្ញាធរចោទប្រកាន់ថា មិនបានផ្ដល់ចម្លើយពិតប្រាកដស្មោះត្រង់ ដោយចោទដាក់បន្ទុកទៅលើបុគ្គលផ្សេងជំនួស។ នាងបាននិយាយថា នាងមិនបានដឹងថាផលិតផលទាំងនោះគឺខុសច្បាប់នោះឡើយ ដោយនាងទុកចិត្តលើឯកសារបញ្ជាក់ពីការតេស្ត និង ចេញលក់ផលិតផល ដែលខាងរោងចក្រផ្ដល់ឱ្យ។ ផលិតផលទាំងនោះដឹកជញ្ជូនពីក្រុងហាណូយមកកាន់ក្រុមហ៊ុននាង ហើយនាងដាក់លក់ចែកចាយក៏ព្រោះតែទុកចិត្តខាងរោងចក្រ។
យ៉ាងណាមិញ ខាងភ្នាក់ងារស៊ើបអង្កេតបានរកឃើញថា នាង Ngan គឺបានបង្កើត និង ដំណើរការក្រុមហ៊ុន ZuBu Company និង ZuBu Shop Business Household ហើយរាល់សកម្មភាពទាំងអស់ ទាំងផ្នែកហិរញ្ញវត្ថុ និង ដឹកនាំជំនួញ គឺសុទ្ធតែជាការដឹកនាំរបស់នាងទាំងអស់ ដោយភស្តុតាងគ្រប់យ៉ាងដែលក្រុមស៊ើបអង្កេតមានក្នុងដៃគឺចង្អុលយ៉ាងច្បាស់ថា DJ Ngan 98 ជាមេក្លោង និង ដំណើរការរាល់ផលិតផលក្លែងក្លាយទាំងនោះ។ បច្ចុប្បន្ន ករណីមួយនេះដែរ ខាងប៉ូលិសកំពុងបន្តស៊ើបអង្កេតនៅឡើយ៕
ប្រភព៖ VN Express
