ផ្លូវជាង ២ ពាន់កន្លែងនៅតួកគី ត្រូវរាំងស្ទះដោយព្យុះព្រិលវាយលុក ធ្វើឱ្យពលរដ្ឋមិនអាចធ្វើដំណើរបាន

ខេត្តចំនួន ១៨ នៅប្រទេសតួកគី កំពុងរងការវាយលុកដោយព្យុះព្រិកយ៉ាងខ្លាំងក្លាបណ្ដាលឱ្យដងផ្លូវរាប់ពាន់កន្លែងត្រូវរាំងស្ទះប៉ះពាល់ដល់ការធ្វើដំណើររបស់ប្រជាពលរដ្ឋ។

តាមការប្រកាសដោយវិទ្យុប្រចាំប្រទេសតួកគី TRT កាលពីថ្ងៃទី ២៣ ខែកុម្ភៈ ឆ្នាំ ២០២៥ កន្លងទៅបានឱ្យដឹងថា ដងផ្លូវចំនួន ២១៧៣ កន្លែងក្នុងខេត្តទាំង ១៨ ពាសពេញប្រទេសត្រូវបានបិទផ្អាកចរាចរណ៍ធ្វើដំណើរដោយសារតែព្យុះព្រិលខ្លាំងក្លាពេក។ មធ្យោបាយធ្វើដំណើរនៅភាគខាងកើតខេត្តគឺរងការប៉ះពាល់ធ្ងន់ធ្ងរ ជាក់ស្ដេងនៅខេត្ត Van មានព្រិលធ្លាក់ក្នុងកម្រាស់ដល់ទៅ ៤០ សង់ទីម៉ែត្រ ខណៈដងផ្លូវនៅតំបន់ដាច់ស្រយាលចំនួន ៤៦ ក្នុងខេត្ត Mus គឺមិនអាចធ្វើដំណើរឆ្លងកាត់បានតែម្ដង។ ជាមួយគ្នានោះ ផ្លូវចំនួន ៥០ ខ្សែទៀតនៅភាគអាគ្នេយ៍ខេត្ត Bitlis ក៏ត្រូវព្រិលរាំងស្ទះទាំងស្រុងដូចគ្នា។

អាជ្ញាធរប្រទេសតួកគី មានការលំបាកខ្លាំងក្នុងការសម្អាតព្រិលដែលធ្លាក់មកយ៉ាងក្រាស់ក្រែលនេះ ស្របពេលអាកាសធាតុបានចុះត្រជាក់ដល់ទៅ -២០ អង្សារសេនៅតាមតំបន់ខ្លះ។ សាលាក៏ត្រូវបានបិទ ហើយខាងការងារការដ្ឋានក៏ត្រូវផ្អាកការសាងសង់ ដោយឡែកខាងផ្នែកអាកាសវិញ ជើងហោះហើររាប់រយក៏ត្រូវបានលុបចោលកាលពីសប្ដាហ៍កន្លងទៅដែរ។

ក្នុងនោះដែរ ខាងអាជ្ញាធរក៏បានអំពាវនាវឱ្យពលរដ្ឋទាំងអស់អនុវត្តតាមវិធានការដើម្បីការពារខ្លួនក្នុងអាកាសធាតុដ៏អាក្រក់នេះ ហើយបើសិនជាអាចគួរកុំចេញក្រៅបើមិនចាំបាច់ រង់ចាំឱ្យខាងអាជ្ញាធរធ្វើការសម្អាតព្រិលបានរួចរាល់ជាមុនសិន៕

ប្រភព៖ VN Express