កាលពីថ្ងៃទី ១៥ ខែមិថុនា ឆ្នាំ ២០២៥ កន្លងទៅ មានហេតុការណ៍ធ្លាក់ឧទ្ធម្ភាគចក្រមួយគ្រឿងក្បែរព្រះវិហារ Kedarnath រដ្ឋ Uttarakhand ប្រទេសឥណ្ឌា បណ្ដាលឱ្យមនុស្សចំនួន ៧ នាក់នៅលើនោះត្រូវបាត់បង់ជីវិតទាំងអស់។
តាមការបញ្ជាក់ពីមន្ត្រីគ្រប់គ្រងគ្រោះមហន្តរាយប្រចាំសង្កាត់ Rudraprayag ប្រាប់សារព័ត៌មាន PTI បានឱ្យដឹងថា ហេតុការណ៍ធ្លាក់ឧទ្ធម្ភាគចក្រខាងលើបានកើតឡើងនៅពីលើតំបន់ព្រៃ Gaurikund ដោយនៅលើឧទ្ធម្ភាគចក្រនោះមានសាសនិកចំនួន ៥ នាក់ ពីឡុតម្នាក់ និង សមាជិកគណៈកម្មាការព្រះវិហារ Badrinath-Kedarnath ម្នាក់។
ចំពោះមូលហេតុវិញ ខាងមន្ត្រីខាងលើបានបញ្ជាក់ថា ដោយសារតែអាកាសធាតុមិនល្អពិបាកក្នុងការមើលគោលដៅ ទើបបណ្ដាលឱ្យមានសោកនាដកម្មបែបនេះ។ លោកបានបន្ថែមទៀតថា ខាងក្រុមសង្គ្រោះបានចុះទៅដល់ទីតាំងកើតហេតុផងដែរ៕
ប្រភព៖ Kenh14
