Ying Weimin អាយុ ២៦ ឆ្នាំ ជាប៉ូលិសស្រីម្នាក់នៅក្រុង Ningbo ប្រទេសចិន កំពុងផ្ទុះប្រជាប្រិយភាពខ្លាំងលើបណ្ដាញសង្គមក្នុងប្រទេសចិន ដោយសារតែរូបសម្រស់ដ៏ទាក់ទាញ បូករួមជាមួយថ្វីដៃបាញ់កាំភ្លើងដ៏ជំនាញរបស់នាង។
ប៉ូលិសស្រីស្អាត Ying Weimin បានក្លាយជាបុគ្គលល្បីលើបណ្ដាញសង្គមនៅចិន ក្រោយវីដេអូមួយរបស់នាង បង្ហាញសកម្មភាពអំឡុងពេលហ្វឹកហាត់បាញ់កាំភ្លើង។ វីដេអូនោះដែរ ផ្ដើមចេញពីការតម្រៀបដាក់គ្រឿងក្រៅរបស់កាំភ្លើង ដាក់គ្រាប់ រួចក៏បន្តដល់តម្រង់បាញ់ឱ្យចំគោលដៅ។ អ្វីដែលធ្វើឱ្យមហាជនភ្ញាក់ផ្អើលចំហមាត់ គឺនៅពេលដែលនាងបាញ់ គឺត្រង់ខ្លាំងចំគោលដៅរង្វង់លេខ ១០ តែម្ដង។
គួរឱ្យដឹងថា ចាប់តាំងពីក្មេង ប៉ូលិសស្រី Ying តែងតែមានក្ដីស្រម៉ៃចង់ក្លាយជាប៉ូលិសឆ្នើមម្នាក់។ នៅឆ្នាំ ២០១៧ នាងបានចូលរៀននៅបណ្ឌិតសភាប៉ូលិស Zhejiang ផ្នែកបញ្ជាការ និង យុទ្ធសាស្ត្រ ហើយក្រោយបញ្ចប់ការសិក្សាក្នុងឆ្នាំ ២០២១ នាងក៏បានចុះឈ្មោះចូលបម្រើការក្នុងក្រុមស៊ើបអង្កេតឧក្រិដ្ឋកម្ម ហ្វឹកហ្វឺនផ្នែកស៊ើបអង្កេត ការចាប់ខ្លួន និង ជំនាញដោះស្រាយសំណុំរឿង។
នាងបានបង្ហាញសមត្ថភាពលើករណីធំៗជាច្រើន ដូចជាការបង្ក្រាបជនសង្ស័យម្នាក់ និង រក្សាទុកភស្តុតាងក្នុងកុំព្យូទ័រលើករណីពាណិជ្ជកម្មអេឡិចត្រូនិចឆ្លងដែនកាលពីខែមីនា ឆ្នាំ ២០២៣ កន្លងទៅ។ មួយឆ្នាំក្រោយមក នាង និង ក្រុមការងារក៏បានដោះស្រាយបញ្ហាចោរកម្មមួយចំនួន ឃាត់ខ្លួនបានក្រុមឧក្រិដ្ឋជនទាំងមូល និង ប្រមូលប្រាក់បានរាប់ម៉ឺនយ័ន។
ប៉ូលិស Ying បានបញ្ជាក់ឱ្យដឹងថា នាងគឺមិនទាន់ចង់មានមិត្តប្រុសនោះទេ បើទោះក្រុមគ្រួសារជំរុញយ៉ាងណាក៏ដោយ។ នាងផ្ដោយសំខាន់តែលើការពង្រឹងការងារ ដោយសម្រាកខ្លួននៅផ្ទះបានតែមួយថ្ងៃប៉ុណ្ណោះក្នុងមួយសប្ដាហ៍៕
