ផ្ទុះប្រតិកម្មដូចព្យុះ ក្រោយប្ដីប្រពន្ធតារាចិនមួយគូ ត្រូវគេយករូបថតទៅដាក់ធ្វើជាសញ្ញាបញ្ជាក់ខាងប្រុសខាងស្រីនៅបន្ទប់ទឹកសាធារណៈ

គូស្នេហ៍តារាចិន Deng Chao និង Sun Li កំពុងក្លាយជាប្រធានបទក្ដៅគគុកតាមបណ្ដាញសង្គមក្នុងប្រទេសចិន ក្រោយរូបភាពរបស់ពួកគេទាំងពីរត្រូវបានគេយកទៅប្រើប្រាស់ធ្វើជាសញ្ញាបញ្ជាក់ភេទនៅបន្ទប់ទឹកសាធារណៈមួយកន្លែង។

តាមរយៈរូបថតដែលកំពុងផ្ទុះក្ដៅលើអនឡាញ បានបង្ហាញឱ្យឃើញរូបប្ដីប្រពន្ធតារាមួយគូនេះត្រូវបានគេយកទៅដាក់តាំងលើជញ្ជាំងនៃបន្ទប់ទឹក ដោយបន្ទប់ទឹកនោះគឺគ្មានដាក់ស្លាក «បន្ទប់ទឹកប្រុស» ឬ «បន្ទប់ទឹកស្រី» ឡើយ ដោយគេប្រើប្រាស់រូបរបស់តារាមួយគូនេះមកធ្វើជាស្លាកជំនួសវិញ។

រូបភាពទាំងនេះដែរ ធ្វើឱ្យមានការផ្ទុះវែកញែកខ្លាំងតាមបណ្ដាញសង្គមនៅចិន ដោយមហាជនមួយចំនួនមើលទៅដូចជារឿងគួរឱ្យអស់សំណើច ខណៈមួយចំនួនទៀតបង្ហាញប្រតិកម្មមិនពេញចិត្តដោយរិះគន់ថាការធ្វើបែបនេះដូចជាគ្មានការគោរពដល់បុគ្គលល្បីទាំងពីររូបនោះឡើយ។ ជាក់ស្ដែង មហាជនម្នាក់លើកឡើងថា៖ «តើនរណាអីក៏មិនចេះគិតប្រើប្រាស់រូបតារាមកធ្វើជាស្លាកសញ្ញាបន្ទប់ទឹកបែបនេះ? ពិតជាអត់សីលធម៌មែន» ខណៈម្នាក់ទៀតដាក់ផាំងៗដែរថា៖ «តើអ្នកឯងមានអារម្មណ៍យ៉ាងម៉េចបើសិនជាគេយករូបខ្លួនឯងទៅបិទលើទ្វារបន្ទប់ទឹកបែបនេះ?»៕

ប្រភព៖ 8days