ព្យុះទីហ្វុង រ៉ាហ្គាសា (Ragasa) ដែលជាព្យុះស៊ីក្លូនត្រូពិចដ៏ខ្លាំងក្លាបំផុតប្រចាំឆ្នាំនេះ បានវាយប្រហារដល់ប្រទេសចិនហើយ ក្រោយសម្លាប់ជីវិតមនុស្សអស់ ១៧ នាក់នៅកោះតៃវ៉ាន់។ ជាមួយគ្នានោះដែរ បើក្រឡេកមើលតាមបណ្ដាញសង្គមនៅក្នុងប្រទេសចិនឯណោះវិញ ឃើញថាមានមនុស្សជាច្រើនបានចែករំលែកពីវិធីសាស្ត្រនៃការបញ្ចៀសកុំឱ្យព្យុះបោកបក់បំផ្លាញទ្រព្យសម្បត្តិរបស់ពួកគេ ដោយវិធីសាស្ត្រនោះដែរគឺគួរឱ្យចាប់អារម្មណ៍ និង ហួសការរំពឹងទុកខ្លាំងមែនទែន គឺពួកគេបានប្រើប្រាស់រូបភាពរបស់តារាសម្ដែងប្រុស Nicholas Tse ធ្វើជាយន្តជាខែលដើម្បីទប់ទល់នឹងព្យុះសង្ឃរា។
វិធីសាស្ត្រដ៏ថ្មីយករូប Nicholas Tse បិទពេញមុខទ្វារការពារព្យុះនេះដែរ គឺផ្ទុះផ្អើលខ្លាំងលើបណ្ដាញសង្គម Weibo ដោយហេតុផលដែលពួកគេជ្រើសរើសតារាប្រុសរូបនេះធ្វើជាយន្តទប់ទល់នឹងព្យុះនេះ ក៏ព្រោះតែឈ្មោះរបស់តារាប្រុសរូបនេះអានថា «Tse Ting-fung» អានចេញស្រដៀងនឹងឃ្លាជាភាសាចិនដែលប្រែមកថា «សូមបញ្ឈប់កម្លាំងខ្យល់ផង»។ ដោយសារបែបនេះហើយ ទើបមានមនុស្សជាច្រើននាំគ្នាប្រើប្រាស់រូបភាពតារាប្រុសរូបនេះដើម្បីជាខែលទប់ទល់នឹងព្យុះ រ៉ាហ្គាសា។
គួរឱ្យដឹងថា ព្យុះទីហ្វុង រ៉ាហ្គាសា បានបោកបក់ដល់កោះ Hailing នាឈូងសមុទ្រនៃក្រុង Yangjiang ខេត្ត Guangdong ប្រទេសចិន កាលពីវេលាម៉ោងប្រមាណ ៥ ល្ងាចថ្ងៃទី ២៤ ខែកញ្ញា ឆ្នាំ ២០២៥ (ពេលវេលាក្នុងតំបន់)។ បើតាមការិយាល័យឧតុនិយមក្នុងតំបន់បានបញ្ជាក់ថា ក្នុងពេលបោកបក់មកដល់ភ្លាម ព្យុះ រ៉ាហ្គាសាគឺស្ថិតក្នុងកម្រិតទី ១៣ ជាមួយកម្លាំងខ្យល់ជិតកណ្ដាលព្យុះហក់ឡើងដល់ ១៤៥ គីឡូម៉ែត្រក្នុងមួយម៉ោង ជាហេតុបណ្ដាលឱ្យបាក់រលំដើមឈើ និង ប៉ះពាល់ដល់អគារជាច្រើន រួមទាំងបណ្ដាលឱ្យដាច់ចរន្តអគ្គិសនីប្រើប្រាស់តាមតំបន់មួយចំនួនផងដែរ៕
