តារាសម្ដែងស្រីកូរ៉េខាងត្បូង Lee Si Young ដែលផ្ទុះប្រជាប្រិយភាពក្នុងការបង្ហាញវត្តមានសម្ដែងជាតួអង្គក្នុងរឿង «Boys Over Flowers» និង រឿងភាគដ៏ល្បី «Sweet Home» ថ្មីៗនេះបានធ្វើឱ្យអ្នកគាំទ្រជាច្រើនមានការភ្ញាក់ផ្អើលខ្លាំងក្រោយរូបនាងប្រកាសពពោះកូនទី ២។
តាមការទម្លាយ Lee Si Young បានពពោះដោយការបង្កកំណើរកូនក្រៅស្បូន (IVF) ដោយប្រើប្រាស់អំប្រ៊ីយុងដែលរក្សាទុក (ការបង្កកកូនទុក) បង្កកំណើតជាមួយមេជីវិតរបស់អតីតស្វាមីរបស់នាង ទាំងដែលដំណើរការយកកូននេះ នាងមិនបានសុំការយល់ព្រមពីអតីតស្វាមីនោះឡើយ។
គួរឱ្យដឹងថា តារាសម្ដែងស្រី Lee Si Young បានរៀបការជាមួយម្ចាស់ភោជនីយដ្ឋានឈ្មោះ Cho Seong Hyun រយៈពេល ៨ ឆ្នាំ និង ទទួលបានចំណងដៃកូនប្រុសម្នាក់ជាមួយគ្នា។ យ៉ាងណាមិញ កាលពីខែមីនា ឆ្នាំ ២០២៥ កន្លងទៅនេះ នាងក៏បានប្រកាសថាចំណងអាពាហ៍ពិពាហ៍មួយនេះបានដើរដល់ផ្លូវបញ្ចប់។
ក្នុងការបង្ហោះប្រកាសពពោះកូនទី ២ នេះដែរ Lee Si Young បានសរសេរសារវែងអន្លាយរៀបរាប់ពីទំហំនៃក្ដីស្រឡាញ់ចំពោះកូនប្រុសឈ្មោះ Jeong Yoon និង ទម្លាយពីមូលហេតុដែលសម្រេចចិត្តយកកូនទី ២ ទាំងមិនមានស្វាមីនេះ។ នាងបានរៀបរាប់ថា៖ «ពេលមុនខ្ញុំនៅក្មេង និង មានចំណុចខ្វះខាតច្រើន។ រាល់ពេលខ្ញុំសម្លឹងមើល Jeong Yoon ដែលនៅលើដៃខ្ញុំ ខ្ញុំសោកស្ដាយ និង បន្ទោសខ្លួនឯងចំពោះពេលវេលាដែលបានចំណាយលើរឿងអវិជ្ជមាន និង ការថប់បារម្ភ។ ហេតុនេះហើយទើបខ្ញុំសន្យានឹងខ្លួនឯងថា ខ្ញុំនឹងមិនឱ្យរឿងស្ដាយក្រោយនេះកើតឡើងជាថ្មីទៀតទេ ប្រសិនបើខ្ញុំមានឱកាសម្ដងទៀតក្នុងជីវិត»។
Lee Si Young និង អតីតស្វាមី បានបង្កកមេជីវិតរបស់ពួកគេទុកក្រោយមាន Jeong Yoon។ ពួកគេគឺមានគម្រោងយកកូនទី ២ ជាមួយគ្នា ប៉ុន្តែពួកគេមិនទទួលបានដំណឹងថាមានអំប្រ៊ីយុងណាបង្កកំណើតបានឡើយរហូតដល់ពេលពួកគេលែងលះគ្នា។ Lee Si Young និយាយថា អំប្រ៊ីយុងដែលបង្កកទុករយៈពេល ៥ ឆ្នាំទីបំផុតអាចយកបានហើយ ដូច្នេះនាងសម្រេចចិត្តដំណើរការវិធីសាស្ត្រមួយនេះ។ នាងបាននិយាយថា៖ «ភាគីម្ខាងទៀតគឺមិនគាំទ្រអ្វីដែលខ្ញុំកំពុងធ្វើនេះឡើយ តែខ្ញុំនឹងជាអ្នកទទួលខុសត្រូវទាំងស្រុង»។
នាងដឹងដែរថា នាងអាចនឹងជួបប្រទះការលំបាកជាច្រើននៅថ្ងៃអនាគត ប៉ុន្តែនាងនៅតែរក្សាជំហរលើការសម្រេចចិត្តមួយនេះដដែល។ បន្ថែមពីនេះ នាងក៏បើកចិត្តទទួលនូវរាល់ការរិះគន់ និង ការណែនាំនានានៅថ្ងៃអនាគតដូចគ្នា។ ការប្រកាសរបស់តារាសម្ដែងស្រី Lee Si Young នេះដែរ បានធ្វើឱ្យមហាជនតាមបណ្ដាញសង្គមជាច្រើននាំគ្នាបញ្ចេញមតិរៀងៗខ្លួន ដោយខ្លះបានស្ញប់ស្ញែងនាងជាមនុស្សក្លាហាន និង លើកទឹកចិត្តនាងផងដែរ ខណៈមួយចំនួនទៀតណែនាំថា ការសម្រេចចិត្តនេះគួរតែទទួលបានការយល់ព្រមពីអតីតស្វាមីរបស់នាងដែរ ព្រោះថាវាអាចពិបាកលើសិទ្ធិមាតាបិតា ឬការទទួលខុសត្រូវកូនរួមគ្នា ហើយវាក៏អាចប៉ះពាល់ដល់អនាគតកូនផងដែរ។
ដោយឡែកបើតាមរបាយការណ៍ព័ត៌មាន អតីតស្វាមីរបស់ Lee Si Young មិនយល់ព្រមលើការពពោះកូនក្រោយនេះក៏ដោយ ប៉ុន្តែលោកនិយាយថា លោកនឹងបំពេញតួនាទីជាឪពុកពេញទីព្រោះឥលូវកូនរបស់លោកបានចាប់កំណើតមកហើយ៕
ប្រភព៖ 8days
